Área divulgativa Actividades

As actividades, ó igual que a duración da visita, péchanse previamente mediante acordos entre os organizadores da visita e Sotavento.

Consideramos este contacto previo fundamental para o correcto desenvolvemento das actividades, dada a posibilidade de cambiar horarios, elixir actividades e centrar as explicacións nos intereses e inquietudes particulares dos participantes. É por isto que, Sotavento, ofrece ós centros e colectivos a posibilidade de aclarar, propoñer ou suxerir calquera cambio sobre o desenvolvemento inicial das visitas, no número de teléfono 981 - 56 37 77.

As características fundamentais que pretendemos que definan as actividades propostas en Sotavento son:

• Innovadoras
• Lúdicas
• Formativas
• Gratuítas
• Adaptadas ás necesidades do grupo

A duración das visitas varía entre 2 e 7 horas en función das idades, inquietudes e nivel formativo dos participantes.

Detállanse a continuación, algunhas das múltiples actividades que se poden desenvolver no Parque Eólico Experimental Sotavento.

• Visitas guiadas, tanto polo parque (visita ós aeroxeradores, Ruta das Pedras, Ruta do Vento e mámoas) coma polo interior das instalacións (paneis explicativos, maquetas, enerxías renovables e solar, pila de combustible, Sala de Eficiencia Enerxética e sala de control).
• Desenvolvemento de clases, tanto divulgativas coma técnicas, en relación coas distintas enerxías.
• Proxección de vídeos técnico-divulgativos sobre as enerxías renovables e a eficiencia enerxética.
• Para alumnos de primaria, secundaria, e F.P. realización de obradoiros lúdico-técnicos, así como a realización de diferentes xogos interiores ou exteriores dependendo das condicións meteorolóxicas.
• Posibilidade de que os propios profesores impartan clases no auditorio, que se complementarían cunha visita práctica ás instalacións.