 |
         |
||||||||||||||||||||||||||||||||||||||||||||||||||||
  |
|||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||
 |
 |
||||||||||||||||||||||||||||||||||||||||||||||||||||
Luns, 20 de Maio de 2013 |
|||||||||||||||||||||||||||||||||||||||||||||||||||||
|
Dende o ano 2002, data de inicio das actividades educativas e divulgativas de Sotavento, viñéronse realizando distintas e variadas exposicións co fin de achegar complementos interesantes ás actividades educativas levadas a cabo nesta instalación. Estas mostras contribúen á explicación de certos fenómenos importantes ou relacionados cos obxectivos didácticos do parque e teñen, en función do seu interese ou das nosas posibilidades, un carácter temporal ou permanente. As máis significativas recollémolas a continuación:
A Ruta do Vento
Obxectivo: Humanizar as zonas do parque con significado, usando materiais reutilizados. Divulgar de maneira lúdica a cultura xerada do vento. Carácter: Permanente. Período de exposición: Dende o ano 2001. Autora: Sotavento Galicia S.A. Breve decrición: Empregando materiais reutilizados da Central térmica das Pontes, realizáronse distintas esculturas pintadas coas seis cores que indentifican as seis enerxías renovables. Arpas, macrofrautas, buzios , trompetas e mangas de grandes dimensións, son algúns dos elementos situados na zona exterior do Parque que completan esta Ruta do Vento de aproximadamente catro quilómetros de lonxitude.
AS ENERXÍAS RENOVABLES
Obxectivo: Completar os contidos relacionados co funcionamento e características principais das enerxías renovables e non renovables existentes no Parque. Carácter: Temporal. Período de exposición: Ano 2002. Autora: Adela Leiro. Breve decrición: Cedida pola profesora Adela Leiro do IES Francisco Asorey de Cambados, realiza unha viaxe a través da enerxías renovables e non renovables amosando unha ampla información sobre cada unha delas en 14 paneis de gran formato e espectacular deseño.
AS ENERXÍAS DO PASADO
Obxectivo: Amosar as solucións enerxéticas do pasado, usos e aplicacións relacionándoas coa actualidade. Carácter: Temporal. Período de exposición: Ano 2002. Autora: Gonzalo Rascado. Breve decrición: Mostra composta por distintas maquetas que representan o uso tradicional das enerxías renovables en Galicia. Pódese observar o funcionamento real de batáns, fraguas, muíños hidráulicos e de vento, serradoiros, etc. Van dirixidas a aquelas persoas interesadas en coñecer ou lembrar antigas instalacións tradicionais de aproveitamento das enerxías renovables.
ENXEÑOS EÓLICOS E HIDRÁULICOS
Obxectivo: Dar a coñecer de forma sinxela o funcionamento de centrais de produción eléctrica de gran complexidade. Carácter: Temporal. Período de exposición: Ano 2003. Autor: Adepro e Sotavento Galicia S.A. Breve decrición: Formada por un túnel de vento, un pequeno aeroxerador, turbinas hidráulicas, pilas de combustible e outros exemplos de xeración e acumulación eléctrica. As maquetas, de pequenas dimensións, exemplificaban á perfección o complexo proceso de xeración eléctrica mediante o vento e a auga.
EXPOSICIÓNS E DEBUXOS
Obxectivo: Achegar a visión que os nenos e nenas posúen das enerxías renovables tras a visita ás nosas instalacións. Carácter: Temporal. Período de exposición: Ano 2004. Autores: Máis de 2000 alumnos e alumnas de primaria. Breve decrición: O gran número de nenos e nenas que visitaron as instalacións do Parque foron os verdadeiros artífices desta exposición realizada durante o verán de 2004. Máis de 2000 debuxos foron expostos na base dos aeroxeradores do parque, a razón de 100 debuxos por máquina. Posiblemente foi a mostra de arte infantil máis grande realizada en Galicia, utilizando como soporte os fustes dos aeroxeradores.
EXPOSICIÓN DE EXPERIENCIAS E OBRADOIROS PARTICIPANTES NOS DISTINTOS CERTAMES DE RENOVABLES
Obxectivo: Promover a experimentación con enerxías renovables nos Centros Educativos. Utilizar estes proxectos como parte dos contidos do Parque. Carácter: Temporal. Período de exposición: Ano 2004. Autores: Colexio Belesar, IES Agra do Orzán, IES Agra de Leborís, IES Illa de San Simón, IES Mª Sarmiento. Breve decrición: Aeroxeradores tripá,
de eixe vertical, turbinas hidráulicas, captadores solares, concentradores
solares con e sen seguidor, e ata un parque eólico completo,
son algúns dos experimentos e proxectos presentados ós
Certames de Premios de Renovables que anualmente convoca Sotavento.
MUÍÑOS DO MUNDO
Obxectivo: Relacionar o aproveitamento eólico do pasado cos modernos aeroxeradores do Parque. Coñecer a evolución dos muíños e aeroxeradores ata os nosos días. Carácter: Permanente. Período de exposición: Dende o ano 2004. Autores: Departamento de Divulgación Sotavento. Breve decrición: Un percorrido polos distintos modelos, formas e funcionamento dos modelos máis significativos da historia convídanos a relacionar o presente e o pasado do aproveitamento eólico. Está formada por fotografías dos vinte e catro aeroxeradores e comeza co muíño de Herón de Alexandría acabando o seu percorrido cos modernos aeroxeradores instalados no mar. Un libro xigante coa súa historia, esquemas e descricións completan esta mostra situada na aula divulgativa do Parque.
RUTA DAS PEDRAS
Obxectivo: Amosar a variedade de rochas sobre as que se asenta Galicia, destacada xeoloxicamente pola súa variedade e antigüidade. Carácter: Permanente. Período de exposición: Dende o ano 2005. Autores: Museo de Hª Natural "Luis Iglesias" da Universidade de Santiago de Compostela. Breve decrición: No extremo occidental do Macizo Ibérico afloran os materiais xeolóxicos máis antigos da Península; recollidos, catalogados e colocados ó longo dunha Ruta exterior no Paque, o visitante pode, en aproximadamente un quilómetro, visualizar as pedras máis significativas de Galicia caracterizadas pola idade e lugar de procedencia. Se as condicións climáticas non invitan ó paseo, unha mostra de man situada no interior das instalacións do Parque, facilitará a aproximación á xeoloxía galega. Trípticos e materiais para o seu traballo didáctico completan a denominada "Ruta das Pedras".
ENXEÑOS SOLARES
Obxectivo: Concienciar sobre a posibilidade real que o aproveitamento do sol ten dentro da nosa Comunidade. Carácter: Temporal-Permanente. Período de exposición: Dende o ano 2005. Autores: Juan Bello e a Fundación Terra. Breve decrición: Na mostra destacan, un concentrador
capaz de superar os 1000ºC fabricado co faro dun automóbil,
un pasteurizador solar, duchas solares, así como diversas cociñas
e fornos solares que nos ofrecen a posibilidade de cociñar a
un custo medioambiental económico nulo. A exposición complétase
cunha cociña solar parabólica, cedida pola Fundación
Terra, capaz de cociñar alimentos a 200ºC. Segundo esta
fundación, no mundo consómense 1000 millóns de
m3 de leña en cociñar. Esta presión sobre os bosques
provoca deforestación, desertización e alteracións
climáticas.
BARCOS DE VELA DE CABOTAXE E PESCA ARTESANAL
Obxectivo: Amosar as utilizacións tradicionais dos ventos galegos, precursoras do aproveitamento enerxético actual. Carácter: Temporal. Período de exposición: Ano 2005. Autores: Instituto de Historia e Cultura Naval da Armada Española. Breve decrición: Destacan, dende os galeóns
dedicados ó comercio dentro das nosas rías, ata as típicas
e máis antigas dornas, sen esquecer as bucetas, palangreiras,
polbeiras, volanteiras, etc.
HERBARIO DE SOTAVENTO
Obxectivo: Coñecer as especies vexetais típicas das zonas montañosas galegas, as súas características e usos tradicionais. Carácter: Permanente. Período de exposición: Dende o ano 2005. Autores: Departamento de Divulgación Sotavento. Breve decrición: O herbario componse de vinte e catro paneis-expositores de grandes dimensións onde se inclúe a seguinte información:
No mesmo tamén se incluíron algunha das especies pertencentes ó ensaio-demostración da biomasa que, mediante cultivos enerxéticos, realiza a Universidade de Santiago de Compostela.
O QUIXOTE E O VENTO
Obxectivo: Tomar contacto co texto cervantino, do que se cumpría o 400 aniversario e ó mesmo tempo tamén coa instalación de enerxías renovables en Galicia. Carácter: Permanente. Período de exposición: Dende o ano 2005. Autores: Fundación Sotavento Galicia. Breve decrición: Como argumento establécese que en 26 capítulos das dúas partes do libro, Quixote e Sancho teñen como conversa principal o vento. Con este fío condutor a exposición relaciona estas conversas entre os dous principais personaxes do libro, coa enerxía eólica e as enerxías renovables.
INSTRUMENTOS TRADICIONAIS DE VENTO
Obxectivo: Coñecer os usos tradicionais das fontes naturais para a realización de actividades musicais e lúdicas. Carácter: Temporal. Período de exposición: Ano 2006. Autores: Juan Parga. Breve decrición: A exposición amosa as distintas formas de aproveitamento dos recursos naturais e materiais de reciclaxe para a creación de sons mediante o vento: turutas, zoadeiras, chifres, e asubíos son algúns deles. A mostra conta con reprodutores de discos compactos onde o visitante ten a opción de reproducir os sons reais dalgúns dos curiosos instrumentos. Ademais, un conxunto de paneis fotográficos recolle todo tipo de instrumentos tradicionais do mundo, pertencentes á colección persoal de Juan Parga. Unha proposta de actividades e xogos facilitan o traballo didáctico desta exposición composta por máis de 25 instrumentos.
A GOTA QUE NOS DÁ A VIDA
Obxectivo: Coñecer o ciclo da auga e tomar conciencia do desequilibrio que os nosos actos causan no mesmo. Carácter: Temporal-Permanente. Período de exposición: Con motivo do día Mundial da Auga 2006. Autores: Departamento de Divulgación Sotavento. Breve decrición: En Galicia non existe unha cultura de uso racional deste ben tan prezado e importante para a vida dos seres vivos, quizais porque consideramos a auga abundante e inesgotable. A través desta mostra Sotavento pretende concienciar sobre o seu uso responsable utilizando como fío condutor a Carta Europea da Auga. A mostra estaba composta por:
I SEMANA DE EFICIENCIA ENERXÉTICA EN SOTAVENTO
2006.
Obxectivo: Dar a coñecer as conclusións de Johanesburgo e tomar conciencia da necesidade dun consumo responsable. Carácter: Temporal. Período de exposición: Do 27 de febreiro ó 5 de marzo; con motivo do día Mundial da Eficiencia Enerxética 2006, Sotavento realizou a I Semana de Eficiencia Enerxética. Autores: Ministerio de Medio Ambiente e a Fundación Sotavento Galicia. Breve decrición: Os visitantes poderán realizar distintas actividades relacionadas co uso eficiente da enerxía. Mediante instalacións reais, paneis, aplicacións para calcular o consumo doméstico, proxeccións audiovisuais e consellos destinados ó aforro enerxético en xeral, Sotavento aborda este tema tan importante para a futura sostibilidade do noso Planeta.
A AGUA NO SÉCULO XXI
Obxectivo: Dar a coñecer a importancia da conservación e bo uso dos recursos hídricos. Carácter: Temporal. Período de exposición: Segundo cuadrimestre 2006. Autores: UNESCO, Fundació Territori i paisatge e a obra social de Caixa Catalunya . Breve descrición: A través da exposición os visitantes puideron entender mellor a importancia do bo uso da auga. Unha guía didáctica facilitaba o traballo pedagóxico da mostra.
EXPOSICIÓN A TRAVES DAS ENERXÍAS
Obxectivo: Dar a coñecer as distintas transformacións enerxéticas e tomar conciencia da necesidade dun consumo responsable. Carácter: Temporal. Período de exposición: Tercer cuadrimestre 2006. Autores: Instituto Enerxético de Galicia (INEGA). Breve descrición: Unha completa panelería asistida por maquetas e elementos enerxéticos reais exemplificaba o funcionamento dos distintos aproveitamentos enerxéticos.
PAPAVENTOS CON HISTORIA
Obxectivo: Destacar un período histórico onde a humanidade empregou estes artefactos voadores para distintos fins relacionados coa publicidade, a fotografía aérea, a guerra, os experimentos científicos e a arela de voar. Carácter: Temporal. Período de exposición: Do 1 de xaneiro ao 31 de decembro de 2007. Autores: Área divulgativa da Fundación Sotavento Galicia e Caixa Nova. Asesores: Juan Miguel Suay e Humberto Fernández. Breve decrición: Composta por doce reproducións dos papaventos máis significativos dende o punto de vista do uso para o que foron concibidos. Destacan os papaventos empregados para fins publicitarios, antiaéreos, de salvamento marítimo, de sinais, meteorolóxicos, etc. Cada reprodución vai acompañada dun panel explicativo que inclúe o inventor, usos, características, o lugar e a data de invención do papaventos e outras curiosidades. Unha publicación completa a mostra situada no mirador da Aula Divulgativa.
"CLARITY"
Obxectivo: Reflexionar sobre os impactos, causas e as posibles solucións do cambio climático. Carácter: Temporal. Período de exposición: Do 1 ao 31 de marzo de 2007. Autores: Ministerio de Medio Ambiente e a Fundación Sotavento Galicia. Breve decrición: Composta por paneis, maquetas, un cajxón interactivo e un xogo do “consumo”, os visitantes poden realizar distintas actividades relacionadas co cambio climático. Non esquezamos que, como protagonistas de "emisións difusas" (producidas en concepto de consumo de enerxía no fogar e no transporte), somos responsables directos do 30% das emisións de CO2.
MAQUETAS DE SISTEMAS DE APROVEITAMENTO ENERXÉTICO TRADICIONAL
Obxectivo: Completar os contidos ofrecidos pola Fundación Sotavento encamiñados a divulgar as posibilidades das enerxías renovables, facilitanto as relacións entre o funcionamento pasado e presente dos sistemas de aproveitamento enerxético das fontes naturais: vento, ríos e mares. Carácter: Temporal. Período da exposición: Do 12 de xullo ao 30 de novembro de 2007. Autores: "Obradoiro de Maquetas" do Centro de Educación e Promoción de Adultos do Centro Penal de Bonxe. Breve descrición: A mostra está composta por batáns, muíños de mareas, ferrarías, serras de auga, etc. Ata seis pezas de gran calidade onde se reproduce detalladamente o funcionamento dos antigos sistemas de aproveitamento enerxético renovable. O Centro Penal de Bonxe realiza estes obradoiros coa finalidade de vincular aos internos coa actividade educativa, aprender cousas sobre a nosa cultura e ao tempo, ocupar positivavente os momentos de lecer na prisión.
EXPOSICIÓN DE AERONAVES
Obxectivo: Profundar na nosa capacidade de aproveitar o vento en beneficio propio, reflexionar sobre os importantes avances propiciados pola arela da humanidade de conquistar os ceos e coñecer os principios básicos do voo dos avións e helicópteros. Carácter: Temporal. Período da exposición: Do 11 de agosto ao 31 de outubro de 2007. Autores: Club de aeromodelismo "Los diablos" de Begonte. Breve descrición: A mostra incorpora numerosos modelos de avións e helicópteros de acrobacia, reproducións exactas de modelos históricos, modelos de competición en distintas modalidades, así como unha completa información sobre o funcionamento, características de voo e manexo. En total 12 modelos entre os que se atopan os campión e subcampión galego e terceiro clasificado a nivel estatal na modalidade de acrobacia.
“SCIENCE&ART”: CIENCIA Y ARTE
Obxectivo: Mostrar a relación entre Ciencia e Arte. Na mostra poden observarse diversas obras nas que se plasman principios, leis e ecuacións de Física e Química. Cada obra inclúe unha breve explicación do feito físico-químico no que se inspira, intentando divulgar dun xeito artístico o traballo científico. Carácter: Temporal. Período da exposición: Do 3 de xaneiro ao 3 de marzo do 2008. Autores: Margarita Cimadevila. Breve descrición: A autora inspirase nos principios, ecuacións e leis do mundo da Física e da Química, para presentar 14 lenzos de formato 100x100 cm e técnica mixta. Cimadevila, docente de Física e Química e artista, une os seus dous mundos na súa obra pictórica, para presentar esta proposta na que Ciencia e Arte se misturan.
EL CERN: LABORATORIO MUNDIAL DE INVESTIGACIÓN EN FÍSICA
Obxectivo: Dar a coñecer o CERN, primeiro laboratorio mundial de investigación en física de partículas. Carácter: Temporal. Período da exposición: Do 3 de xaneiro ao 3 de marzo do 2008. Autores: CERN. Breve descrición: Mediante pequenos paneis dáse a coñecer este laboratorio mundial da física. O CERN atópase en Suíza, próximo á fronteira con Francia. Conta cunha serie de aceleradores de partículas entre os que destaca o, xa desmantelado, LEP (Large Electron-Positron Collider, Gran Colisionador Electrón-Positrón) de 27 km de circunferencia e que constitúe a máquina máis grande xamais construída. Fotos e datos deste laboratorio deleitaron aos visitantes interesados en coñecer esta espectacular instalación.
“EL MUNDO QUE TENEMOS, ¿PODEMOS MEJORARLO?”
Obxectivo: Exposta con motivo do día Mundial da Eficiencia Enerxética pretende:
Carácter: Temporal. Período da exposición: Do 1 ao 31 de marzo do 2008. Autores: Ministerio de Medio Ambiente e a Fundación Sotavento Galicia. Breve descrición: A través de 20 paneis e varias maquetas interactivas, levando como fío condutor temas de enerxía, auga e biodiversidade, establécense relacións coas actividades cotiás e amósanse respostas positivas para facer posible un desenvolvemento sostible. Para o seu mellor aproveitamento elaborouse en Sotavento un material didáctico específico.
SISTEMAS DE ILUMINACIÓN ANTIGOS
Obxectivo: Conmemorar acontecementos históricos, pouco coñecidos e que situaron a Galicia na vangarda da investigación eléctrica. Así, a noite do 2 de Abril de 1851, no patio do Colexio de Fonseca da Universidade de Santiago de Compostela o profesor monfortino Antonio Casares, acendeu por primeira vez un arco voltaico. Deste xeito empregouse por primeira vez a luz eléctrica en España. Esta mostra constitúe a primeira entrega dunha serie formada por tres exposicións realizadas en colaboración co Museo de Arte Contemporáneo de Unión Fenosa. Carácter: Temporal. Período da exposición: Do 1 ao 30 de abril do 2008. Autores: Museo de Arte Contemporáneo de Unión Fenosa (MACUF) e a Fundación Sotavento Galicia. Breve descrición: A mostra conta con varias ducias de pezas, entre as que se inclúen unha gran variedade de lámpadas eléctricas, quinqués, candís, cables, portalámpadas e interruptores do século pasado., ademais de diversa documentación sobre os fitos máis importantes que deron lugar á aparición da luz eléctrica en Galicia.
APARATOS ANTIGOS DE MEDICIÓN ELÉCTRICA
Obxectivo: Trátase da segunda entrega dunha serie de exposicións que pretenden resaltar a importancia da aparición e o desenvolvemento da electricidade en Galicia durante o século pasado. Carácter: Temporal. Período da exposición: Do 15 de maio ao 15 de Xuño. Autores: Museo de Arte Contemporáneo de Unión Fenosa (MACUF) e a Fundación Sotavento Galicia. Breve descrición: A mostra consta de máis dunha vintena de aparatos de medición eléctrica empregados durante varias décadas no século XX. Diversos amperímetros, vatímetros, voltímetros e outras pezas de gran interese completan a exposición.
INSTALACIÓNS E MAQUETAS ELÉCTRICAS: PRESENTE E PASADO
Obxectivo: Terceira e última entrega do ciclo de exposicións encamiñadas a conmemorar fitos históricos pouco coñecidos relacionadas coa electricidade así como a resaltar a importancia de Galicia na aparición e desenvolvemento da electricidade en España. Carácter: Temporal. Período da exposición: Do 15 de xuño ao 15 de setembro. Autores: Museo de Arte Contemporáneo de Unión Fenosa (MACUF) e a Fundación Sotavento Galicia. Breve descrición: Na mostra inclúense instalacións reais de antigos sistemas de produción eléctrica como diversos grupos motrices e xeradores das primeiras centrais hidráulicas galegas datadas do ano 1904, a góndola restaurada dun vello aeroxerador de 15 kW de potencia, a maqueta dunha central nuclear, diverso material eléctrico e numerosa documentación gráfica.
DESCUBRINDO O TEMPO
Obxectivo: Coñecer conceptos básicos do tempo meteorolóxico e os factores que lle poden influír. Carácter: Temporal. Período de exposición: 23 de marzo ao 30 de abril, con motivo da celebración do Día Meteorolóxico Mundial en Sotavento. Autores: Consellería de Medio Ambiente da Xunta de Galicia. Breve descrición: Composta por máis dunha decena de paneis explicativos, nos que se ilustran conceptos básicos do tempo meteorolóxico que aparecen a diario nas nosas vidas (nubes, mapas do tempo, tormentas, climas, instrumentos de medida, etc.). Tamén se realiza un achegamento a factores esenciais do clima da Terra como é o efecto invernadoiro.
MAQUETAS E XOGUETES SOLARES
Obxectivo: Mostrar pequenos xoguetes e maquetas eléctricas con fins lúdicos que funcionan con placas fotovoltaicas alimentadas polo Sol. Carácter: Temporal. Período de exposición: Do 12 ao 22 de maio, con motivo da celebración dos “European Solar Days” en Sotavento. Autores: Departamento de Divulgación Sotavento. Breve descrición: Máis dunha decena de maquetas decorativas e pequenos xoguetes accionados mediante placas solares fotovoltaicas. A mostra incluía maquetas de helicópteros, avionetas, carros de golf, muíños, carruseis, etc.
PEIXES ELECTRÓNICOS
Obxectivo: Fusionar ciencia e arte, mediante a mestura de elementos electrónicos con peixes que posúen propiedades eléctricas, luminiscentes, etc., pintados con acrílicos sobre lenzo. Carácter: Temporal. Período de exposición: Do 27 de maio ao 31 de xullo de 2009. Autores: Wolfgang Trettnak. Breve descrición: Unha decena de cadros nos que aparecen representados distintas especies de peixes mesturados con compoñentes electrónicos como placas, circuítos, díodos, etc. As distintas especies representadas corresponden a animais acuáticos con dous tipos de características. Por un lado peixes eléctricos que utilizan a electricidade como medio de comunicación, orientación, cortexo, caza ou defensa; e por outro aqueles que posúen propiedades bioluminiscentes que utilizan para atraer as presas, como camuflaxe, iluminación, etc. Cada obra conta cunha lenda onde se explica a idea plasmada no cadro.
EXPOSICIÓN DE OBRAS PRESENTADAS AO VII CERTAME RENOVABLE
Obxectivo: Promover a experimentación con enerxías renovables, especialmente nesta edición aqueles experimentos que teñan relación coa construción bioclimática; fomentar a creatividade fotográfica. Utilizar estes materiais como parte dos contidos do Parque. Carácter: Temporal Período de exposición: Ano 2009. Autores: Arsenio Paz Cibreiro, Javier Blanco Otero, Diego Fernández Somozas, Antonio Valín Valdés, María Dolores Prado Rouco, María López Novo, Manuel López Novo, Paula Gómez del Valle y Gómez, Francisco González Dopico, Monica Pereira Saqués, Javier Fuentes Pena, Noemí Parga López, Diego López Fernández. Breve descrición: Experiencias: maqueta dunha vivenda tradicional galega, construída en madeira e lousa orixinaria da zona. Galería e ventás orientadas ao Sur, co fin de quentar a vivenda de forma natural. Inclúe unha pequena instalación de enerxía solar fotovoltaica que recarga unhas baterías destinadas a alimentar a iluminación interior da maqueta. Fotografía: máis dunha trintena de fotografías presentadas ao certame, cuxo tema central é o Parque Eólico Experimental Sotavento, e nas que dende diferentes enfoques se mostra a calidade fotográfica e a creatividade dos seus autores.
UNHA AUTOPISTA DETRÁS DO ENCHUFE. A ELECTRICIDADE DA CENTRAL Á TUA CASA
Obxectivo: Achegar e explicar á cidadanía como se manifesta, produce e transporta a electricidade, como se operan os sistemas e en definitiva, que pasa coa electricidade dende que se xera ata que chega ás nosas casas. Carácter: Temporal. Período de exposición: Do 24 de xullo ao 31 de decembro de 2009. Autores: Red Eléctrica de España. Breve descrición: A través dunha grande variedade de módulos interactivos e pezas reais, que ocupan 500 metros cadrados, faise un profundo percorrido pola historia, xeración, e transporte de electricidade. Tamén mediante vídeos e diversas reproducións se amosa o traballo de REE: como é a rede de alta tensión española, que é o Centro de Control Eléctrico (Cecoel) e como podería ser o futuro da enerxía coa denominada “supercondutividade”. Ademais, hai espazo para explicar os traballos de REE no ámbito do medio natural, por exemplo na protección das aves.
AS NOSAS PROPIAS SOLUCIÓNS
Obxectivo: Sensibilizar sobre a importancia de avanzar cara un mundo sostible, cuestionar as ideas preconcebidas sobre medio ambiente e desenvolvemento, sinalar alternativas eficaces de boas prácticas ambientais e promover hábitos e comportamentos favorables ao desenvolvemento sostible. Carácter: Temporal. Período de exposición: Do 25 de xaneiro ao 23 de febreiro do 2010, con motivo do Día Mundial da Eficiencia Enerxética. Autores: Ministerio de Medio Ambiente. Breve descrición: A través de 14 paneis preséntase un periódico en formato de exposición, onde se reflexa o traballo de centos de persoas, traballando pola súa propia conta ou dende algunha institución, por dar solucións concretas a problemas reais, sobre o panorama negativo do noso planeta.
DESENVOLVEMENTO SOSTE... QUÉ?
Obxectivo: Cuestionar as ideas preconcebidas sobre medio ambiente e desenvolvemento, sensibilizar sobre a importancia dos recursos naturais dos que dispoñemos, promover hábitos e comportamentos responsables co consumo racional da auga e coñecer as distintas fontes de enerxía renovables. Carácter: Temporal. Período de exposición: Do 24 de febreiro ao 5 de abril do 2010, con motivo do Día Mundial da Terra. Autores: Ministerio de Medio Ambiente. Breve descrición: Oito paneis condúcennos por un camiño no que se prima o uso de enerxías limpas, o consumo responsable, a redución dos residuos, o reciclado, o comercio xusto e solidario, unha agricultura máis acorde co medio, o respecto a outras culturas...
CIENCIA EX AEQUO
Obxectivo: Amosar a relación entre Ciencia e Arte mediante unha temática moi variada na que se representan campos da física, química, bioloxía, matemáticas e astronomía. Carácter: Temporal. Período de exposición: 15 de marzo ao 22 de xullo do 210. Autores: Margarita Cimadevila. Breve descrición: A autora galega Margarita Cimadevila, licenciada en Ciencias Químicas e artista, pretende plasmar nesta obra de doce lenzos os seus dous mundos, Ciencia e Arte. Esta obra rende homenaxe a mulleres científicas da Historia que, a pesar de realizar un traballo memorable, foron ignoradas ou relegadas a un segundo plano a favor dos seus compañeiros ou competidores varóns. Cada lenzo vai acompañado, ademais, dunha breve explicación científica e dunha nota biográfica.
MAQUETAS E XOGUETES SOLARES II
Obxectivo: Amosar pequenos xoguetes e maquetas eléctricas con fines lúdicos que funcionan con placas fotovoltaicas alimentadas polo Sol. Carácter: Temporal. Período de exposición: Do 17 ao 23 de maio, con motivo da celebración dos “European Solar Days 2010” en Sotavento. Autores: Departamento de Divulgación Sotavento. Breve descrición: Máis dunha decena de maquetas decorativas e pequenos xoguetes accionados mediante placas solares fotovoltaicas volven a expoñerse en Sotavento con motivo da Semana Solar Europea 2010. A mostra inclúe maquetas de aeroxeradores, muíños hidráulicos, bicicletas, reloxos, carruseis, etc.
EXPOSICIÓN DE OBRAS PRESENTADAS AO VIII CERTAME RENOVABLE
Obxectivo: Promover a experimentación con enerxías renovables e coas construcións bioclimáticas, fomentar a creatividade fotográfica e utilizar estes materiais como parte dos contidos do Parque. Carácter: Temporal. Período de exposición: Ano 2010. Autores: Miguel García Irimia, Rebeca Tizón Rey, Víctor Schäfer Freire, Aitor Eimil Fernández, Mónica Pereira Saqués, Antía Rana Rivas, Concha Quintela Rego, Diego Fernández Somoza, Francisco González Dopico. Breve descrición: Experiencias: maqueta a escala 1:10 dunha vivenda bioclimática construída en madeira, granito e materiais da zona. Galería e ventás de cristal cara o Sur, co fin de quentar e iluminar a vivenda de xeito natural. Fachadas illadas con lá de rocha e calefacción por chan radiante. Unha instalación solar fotovoltaica aporta enerxía para a iluminación de dous leds e o funcionamento dun ventilador de teito. Fotografía: máis de vinte e cinco fotografías presentadas ao certame, cuxo tema central é o Parque Eólico Experimental Sotavento, e nas que, dende diferentes enfoques, se amosa a calidade fotográfica e a creatividade dos seus autores.
CON A DE ASTRÓNOMAS
Obxectivo: Achegar ao visitante dunha forma orixinal, diferente e amena á Astronomía, dando a coñecer distintos campos desta ciencia. Carácter: Temporal. Período de exposición: Do 1 de Febreiro ao 4 de Marzo do 2011. Autores: Grupo interdisciplinar de nove persoas de distintos centros de investigación, entre elas as comisarias Josefina Ling e Eulalia Pérez Sedeño. Breve descrición: A través dunha serie de paneis faise un percorrido entre os principais fitos da astrofísica onde o papel da muller foi fundamental desde a antigüidade ata os nosos días. O descubrimento dos púlsares, a estrutura a gran escala do Universo, ou a medida das distancias estelares son explicadas dun xeito divulgativo e ameno. Consta de 13 paneis, o primeiro de presentación, 9 dedicados a conceptos astronómicos, dous á contextualización histórica e a mostrar a relación entre astronomía e cultura e un que recopila os nomes de 116 astrónomas españolas.
UNHA MIRADA MATEMÁTICA
Obxectivo: Achegar ao visitante dunha forma orixinal, diferente e amena ás matemáticas, así como amosarnos as simetrías da natureza a través do ollo fotográfico. Carácter: Temporal. Período da exposición: Do 1 de xullo ao 31 de agosto do 2011. Autora: Nieves Díaz Fernández. Breve descrición: A través de 63 láminas de 42x32 cm (unha de presentación, dúas de descricións e 60 fotografías), amósanos as simetrías da natureza a través do ollo fotográfico. A mostra permítenos descubrir o que é capaz de ver o ollo guiado por unha mente instruída nas matemáticas. A autora, profesora desta "ciencia das ciencias", amósanos dende a fotografía, cómo poden manifestarse as formas xeométricas no noso entorno. Achega así a natureza, arquitectura e obxectos cotiáns ao visitante dunha forma orixinal, diferente e amena.
EXPOSICIÓN DE OBRAS PRESENTADAS AO IX CERTAME RENOVABLE
Obxectivo: Incentivar distintas iniciativas relacionadas co mundo das enerxías renovables en xeral e coa idea de Sotavento en particular e utilizar este material como parte dos contidos do Parque. Carácter: Temporal. Período da exposición: Ano 2011. Autores: Benito Lourido Nieto, Bernardo Cortijo Correas, José Ignacio Hermida Bermúdez, Ana Belén Álvarez López, Irene Derungs Ollero, Ana Ginzo Villamayor. Breve descrición: Experiencias: Maqueta solar construída principalmente con materiais reciclados. Fotografías: varias fotografías presentadas ao Certame, cuxo tema central é o Parque Eólico Experimental Sotavento e nas que, dende diferentes enfoques, amósase a calidade fotográfica e a creatividade dos seus autores.
AUDIO-EXPOSICIÓN "OS INVENTORES DA ELECTRICIDADE"
Obxectivo: Servir como mostra para comprender mellor o transcurso dunha pequena parte da historia da electricidade mediante unha breve viaxe a través dos descubridores dos conceptos básicos desta parte da física. Carácter: Temporal. Período de exposición: Dende novembro do 2011. Autores: Departamento de Divulgación de Sotavento. Breve descrición: Ademais de paneis e obxectos relacionados con cada un deles, un reprodutor de son acompaña ao visitante durante toda a mostra, podendo escoitar unha breve explicación sobre a importancia de diferentes personaxes ao longo da historia da electricidade.
O VENTO NAS LETRAS GALEGAS
Obxectivo: Achegar ao visitante a importancia do vento na nosa Comunidade a través da literatura galega. Carácter: Temporal. Período de exposición: Maio de 2012. Autores: Departamento de Divulgación de Sotavento. Breve descrición: A través da exposición realizada en soporte audiovisual, os visitantes van descubrindo a relación entre o vento e a poesía de autores galegos, a través de fragmentos das súas obras, estas están a disposición para consulta na biblioteca do centro. A maioría destes autores foron conmemorados con motivo das Letras Galegas.
A ENERXÍA MÓVENOS
Obxectivo: Ofrecerlle ao visitante unha perspectiva global sobre a situación enerxética mundial e as novas tecnoloxías que se están investigando para acadar unha electricidade e un transporte máis limpos. Carácter: Temporal. Período da exposición: Dende o 14 de febreiro do 2013. Autor: Centro Superior de Investigacións Científicas (CSIC). Breve descrición: A través de 20 paneis danse a coñecer diferentes modos de produción de enerxía como a enerxía atómica de fusión, solar térmica de concentración, cela de combustible, etc. Tamén se fai fincapé na situación enerxética concreta de España e inclúe consellos e medidas que se poden levar a cabo para contribuír ao cambio de modelo enerxético.
A ESFERA DA AUGA
Obxectivo: Introducir ao visitante no mundo da auga, dende as súas propiedades químicas ata o seu papel na historia e na civilización humana. Carácter: Temporal. Período da exposición: Dende o 22 de marzo do 2013. Autor: Centro Superior de Investigacións Científicas (CSIC). Breve descrición: A exposición consta de 21 paneis divididos en dous bloques. O primeiro, “Auga e Natureza”, segue o curso do ciclo hidrolóxico e a súa relación co clima e cos ecosistemas. O segundo, “Auga e Sociedade”, intérnase na influencia do ser humano no ciclo natural da auga, a súa contaminación, solucións para o acceso á auga potable e a relación deste recurso coa historia, a saúde e a tecnoloxía.
|
||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||
