ÁREA TÉCNICA Proxecto: Supervisión das instalacións eléctricas do Parque Eólico de Sotavento

Nas distintas fases para a instalación dun parque eólico (deseño, construción e montaxe, posta en marcha e explotación) necesítase a coordinación entre a gran variedade de empresas intervenientes (tecnólogos, enxeñería, montadores) de cara ó correcto funcionamento da central de xeración eléctrica. No parque de Sotavento, esta diversidade acentúase coa existencia de cinco tecnoloxías eólicas con diferentes sistemas de xeración eléctrica.

Por todo isto, Sotavento, como parque eólico experimental, realizou un estudo profundo das infraestruturas eléctricas, co obxecto de situar en condicións óptimas de explotación e operación o parque eólico como central de xeración.

O proxecto trata de analizar, desde o punto de vista electrotécnico, os diferentes compoñentes eléctricos da rede de BT, MT, Subestación e liña de 132 kV do parque, permitindo establecer pautas de actuación no deseño e mantemento en diversos campos das instalacións eólicas como poden ser:

• Adecuación do sistema eléctrico instalado, niveis de illamento, redes de terras e dimensionamento do sistema de compensación reactiva.
• Estudo de selectividade de proteccións eléctricas nos distintos niveis de tensión.
• Plan de medidas preventivas e correctivas nas instalacións eléctricas.
• Determinación do comportamento por tecnoloxía e por parque dos aspectos electromagnéticos máis importantes.

Os traballos realizados neste proxecto foron principalmente os seguintes:

• Supervisión de Enxeñería a nivel de planos eléctricos de funcionamento. Análise de: subestación, liñas, cables de potencia en aeroxeradores, proteccións seleccionadas en cada aeroxerador e axustes implantados na subestación.
• Supervisión de características xerais da aparellaxe de MT e AT e comprobación do seu adecuado dimensionamento.
• Supervisión dos axustes de proteccións de MT e AT. Estudo de selectividade a partir do cálculo de fallas monofásicas e trifásicas nos distintos puntos do parque. Carencias e posibilidades de mellora.
• Supervisión das instalacións en réxime de servizo con medicións, analizando os valores observados en cada punto de MT/AT. Realizáronse medidas nos grupos de aeroxeradores existentes para dispor de información básica do comportamento real de cada grupo de sistema de xeración, en canto a enerxía activa e reactiva.
• Entrega do informe definitivo.

D. Juan Rodríguez foi o responsable e coordinador da realización do estudo, con achega de medios materiais para a súa realización das Universidades da Coruña e Vigo.

O proxecto, neste momento, atópase finalizado, e avaliando posibles melloras a implementar nas instalacións a partir das conclusións do informe.

• Estudio y supervisión de las instalaciones de AT/MT Sotavento. (No vínculo, non aparece completo, só o tema I - Caracterísiticas.)