ÁREA TÉCNICA Proxecto: Instalación de modelos de predición da produción enerxética no Parque Eólico de Sotavento

A predición de produción enerxética de parques eólicos ten carácter estratéxico na situación do mercado eléctrico, por atoparse en fase de transición cara ó libre mercado. A predición aplicada a parques eólicos constitúe unha ferramenta que permitirá xestionar o sistema eléctrico de forma máis eficaz, proporcionando capacidade de previsión da xeración de orixe eólica. O modelo de predición posibilita efectuar ofertas da enerxía que vai producir o parque eólico, co conseguinte valor engadido para a xeración.

O CIEMAT (Centro de Investigaciones Energéticas, Medioambientales y Tecnológicas) realizou no ano 1999 unha revisión da arte internacional dos modelos de predición existentes para parques eólicos. Ademais, no marco deste estudo, o CIEMAT probou dous modelos de predición, o Prediktor do Riso National Laboratory e o WPPT da Universidade Técnica de Dinamarca, nun parque eólico en terreo complexo en España. As conclusións deste estudo de situación dos modelos de predición indicaron que:

• Os modelos desenvolvidos para o terreo chan, non daban bos resultados no terreo complexo.
• A predición meteorolóxica en España necesita unha adaptación específica para o parque eólico que contemple os efectos locais.

O CIEMAT e o CENER (Centro Nacional de Energías Renovables) estableceron un convenio para o desenvolvemento técnico e comercial, das técnicas e programas de predición de vento e produción de enerxía eólica.

En base a este acordo, Sotavento realizou este proxecto co CENER.

Sotavento Galicia, S.A., como parque eólico experimental, mostrou desde os seus comezos un grande interese por avaliar modelos de predición no seu parque, inclinándose polo modelo LocalPred.

Os principais son:

• Mostrar de forma operativa, o funcionamento dun modelo de predición nun parque eólico en terreo complexo.
• Mellorar a integración da enerxía producida no sistema eléctrico, adaptándose á lexislación vixente.
• Contribuír á planificación diaria da demanda eléctrica.

As distintas fases que teñen lugar ó longo do proxecto son:

1. Adquisición das predicións numéricas.

É necesario adquirir a predición numérica dun modelo meteorolóxico, neste caso optouse polo Instituto Nacional de Meteorología mediante o modelo HIRLAM.
Utilizaranse predicións históricas e predicións en tempo real. As predicións históricas servirán para adestrar o modelo de predición e axustalo á zona de estudo. Unha vez que se teña o modelo optimizado, incorporaranse as predicións en tempo real.
2. Recompilación de datos de vento e produción do parque.

O modelo de predición necesita dispor de datos de vento e produción enerxética do parque eólico. SOTAVENTO encárgase de crear unha base de datos coas súas medidas, adaptándoa ó formato que require o modelo de predición.
3. Axuste e optimización do modelo de predición de vento.

A partir das predicións históricas e dos datos medidos de velocidade e produción no parque, axustouse o modelo de predición por CENER-CIEMAT.
4. Modelización do funcionamento do parque eólico fronte ó vento. Obtención da curva do parque.

A partir dos datos sobre o funcionamento e a operación do parque eólico subministrados por SOTAVENTO, modelizarase o funcionamento do parque eólico obtendo unha curva de potencia de parque. Na modelización do parque terase en conta a velocidade, dirección do vento e dispoñibilidade dos aeroxeradores entre outros parámetros.
5. Cálculo de erros do modelo de predición.

Realizarase un primeiro cálculo de erros, tras axustar o modelo para o parque eólico.
6. Instalación do modelo de predición nos equipos de Sotavento.

Realizarase a instalación do modelo de predición nos equipos de SOTAVENTO.
7. Avaliación dos modelos.

Durante a duración do proxecto realizarase un seguimento do funcionamento do modelo. A fase final do proxecto consistirá nunha avaliación do rendemento do modelo de predición.
8. Fase final na que se mellorarán os resultados obtidos.

Os resultados do apartado 7º serven para indentificar as posibles melloras do modelo de predición para o parque eólico de SOTAVENTO. As melloras que se poden incluír:
• Modelos estatísticos máis avanzados.
• Modelización física de alta resolución con MM5 ou FLUENT.

O presente proxecto de colaboración realízase no marco dos contactos mantidos entre, SOTAVENTO, o IDAE e o CIEMAT, co fin de instalar un modelo de predición da produción enerxética no parque eólico de SOTAVENTO.

O proxecto atópase finalizado.

Actualmente estase a traballar cos modelos de predicción eólica a curto plazo (alcance máximo de 120 horas). Algúns destes modelos son:

• MeteoLógica. Predí a enerxía e facilita un mapa do vento, e a súa dirección, orientado ó mantemento. Ten un alcance de 92 horas.
• MeteoGalicia. Estimación dos parámetros do vento (velocidade, dirección, temperatura, presión e densidade). Ten un alcance de 72 horas.