ÁREA TÉCNICA Proxecto: Vivenda Bioclimática
Proxecto Cooperativo Científico Tecnolóxico, Singular e de Carácter Estratéxico de Demostración da viabilidade Técnica e Económica do uso Eficiente da Enerxía na Edificación ENVITE - Plan E, Subvención do Ministerio de Ciencia e Innovación dentro do Plan E e acollido aos Fondos FEDER da UE Expediente PEN-120000-2009-32

Nun século marcado polo esgotamento dos recursos enerxéticos e os problemas ambientais derivados dun exceso de consumo, a Fundación Sotavento Galicia presenta este proxecto que pretende poñer á disposición de todas as persoas interesadas, unha exemplificación real das posibilidades que a bioclimática ofrece de aforrar enerxía e de mellorar a nosa calidade de vida.

Para conseguir este obxectivo, a Fundación Sotavento Galicia construirá unha vivenda duns 200 m2 que tendo en conta o clima e as condición do contorno, empregará o seu deseño e os propios elementos arquitectónicos como principais bazas para obter unhas condicións óptimas de habitabilidade no seu interior. A escasa demanda enerxética da vivenda será proporcionada polos sistemas enerxéticos renovables e/ou eficientes.

A casa, dotada dun sistema integral de xestión, ofrecerá ao visitante toda a información relativa ao seu funcionamento e mesmo permitirá variar as condicións exteriores (temperatura, época do ano, radiación solar, etc.) para comprobar a súa resposta en distintos ambientes simulados.

O principal obxectivo é amosar os fundamentos das construcións bioclimáticas e os distintos fenómenos que nelas se producen, tendentes a obter confortabilidade no seu interior. Por outra banda, tamén se procurará demostrar que dita confortabilidade pode conseguirse de forma sinxela, aforrando enerxía e polo tanto sendo respectuosos co medio natural.

Co fin de conseguir isto, realizarase un percorrido guiado polos seguintes aspectos duhna vivenda bioclimática:

• A importancia do asentamento no terreo e a forma do edificio para controlar as fontes e sumidoiros de calor (sol, ceo, aire e chan).
• A importancia da orientación para un bo funcionamiento bioclimático.
• A optimización e xestión da luz solar no verán e no inverno.
• Os modos de transmisión da calor de acordo cos nosos intereses e habitáculos dentro da vivenda para ter a mellor confortabilidade.
• As cualidades térmicas dos materiais opacos que se empreguen. Materiais illantes, condutores, acumulación de calor e estabilidade térmica.
• Condicións de confortabilidade térmica. Temperatura e humidade relativa
• Usos enerxéticos da vivenda (tipo de electrodomésticos, clases de iluminación, xestión da auga, etc.).
• Funcionamento enerxético integrado da propia vivenda, é dicir, a xestión das condicións bioclimáticas coas achegas das fontes de enerxías renovables necesarias unido á domótica. Posibilidades e efectos destas intervencións.
• Resultados enerxéticos esperados e medidos.
• Posibilidade de extrapolación de resultados a outro tipo de construcións bioclimáticas (casa, piso, etc.).
• O emprego de materiais naturais e locais como elementos importantes dunha arquitectura sostible.
• No proxecto aplicarase integramente o Código Técnico da Edificación, de maneira que acade os valores de excelencia na Cualificación Enerxética.

A demanda enerxética necesaria para a vivenda será proporcionada polos sistemas enerxéticos renovables e/ou eficientes:

• Solar fotovoltaica
• Solar térmica
• Eólica
• Biomasa
• Bomba de calor xeotérmica

Este proxecto está realizado por unha empresa de ampla experiencia en arquitectura bioclimática denominada ALIA, arquitectura, enerxía e medio ambiente, SL., liderando o proxecto o arquitecto D. Emilio Miguel Mitre, profesional de recoñecido prestixio en construcións bioclimáticas.

Neste momento estase a construír a vivenda, esperando que finalicen as obras no verán.

Vivenda Bioclimática Demostrativa	Idioma	Tamaño	Descargar
Vivenda Bioclimática Demostrativa (Completo)	Castelán	25.850 Kb
Portada e Índice	Castelán	1.351 Kb
Introducción, financiación e dificultades do proxecto	Castelán	2.521 Kb
Descrición do proxecto	Castelán	3.875 Kb
A vivenda en detalle	Castelán	5.764 Kb
Funcionamento bioclimático e instalacións térmicas	Castelán	10.963 Kb
Instalacións de xeración eléctrica e consumos	Castelán	6.775 Kb
Xestión da agua	Castelán	3.062 Kb
Monitorización e control	Castelán	1.361 Kb
Espacio divulgativo	Castelán	3.545 Kb
Código técnico da edificación e certificación enerxética	Castelán	1.069 Kb
BibliografÍa e contraportada	Castelán	2.141 Kb