Sotavento Galicia, S.A. constitúese no ano 1997 como un Parque Eólico Experimental promovido pola Xunta de Galicia co obxectivo de crear un novo concepto de parque eólico. Coordina a iniciativa privada e a pública nun proxecto onde se representan as tecnoloxías eólicas implantadas en Galicia.

Sotavento Galicia, S.A. está participada por tres entidades públicas que forman o 51% do capital social: INEGA (Instituto Enerxético de Galicia), SODIGA GALICIA S.R.C., S.A., Instituto para la Diversificiación y el Ahorro de la Energía (IDAE), e catro empresas privadas en representación do sector eléctrico de Galicia: (ECYR), Enel Unión Fenosa Renovables, S.A., Iberdrola Energías Renovables de Galicia, S.A. e Energía de Galicia, S.A. (ENGASA).

O obxectivo é perseguir ademais da explotación comercial dun parque eólico, tres obxectivos que dificilmente serían levados a cabo unicamente coa iniciativa privada:

• Ser un parque "escaparate" das diferentes tecnoloxías eólicas presentes en Galicia.
• Centro de divulgación das enerxías renovables.
• Ser marco para a realización de actividades de I+D.

Para acadar estes obxectivos creou a Fundación Sotavento Galicia.

A diversidade tecnolóxica do parque convérteo nunha plataforma ideal para a investigación, formación e divulgación das enerxías renovables.

O Parque consta dunha liña de 24 aeroxeradores que suman unha potencia instalada de 17,56 MW, estimándose unha produción anual de 38.500 MWh/ano.

Esta enerxía é suficiente para abastecer o consumo de 12.000 familias, aforra o consumo de 68.000 barrís de petróleo, e evita a vertedura de 36.000 toneladas/ano de CO₂.

Neste parque eólico os ventos predominantes son S/W e N/E cunha velocidade media anual de 7,5 m/s (27 km/h).

O Parque Eólico Experimental Sotavento foi inaugurado o 21 de Xullo de 2001 pola súa Alteza Real Don Felipe de Borbón Príncipe de Asturias.