|
|
Sotavento online
listado de noticias
| 02/09/2010 | Comezo do prazo de solicitude de visitas en Sotavento
| O Parque Eólico Experimental Sotavento abre o vindeiro 23 de setembro o prazo para realizar a solicitude de visitas para o curso académico 2010/2011. A partir deste día, poderase solicitar data para todo o curso académico. A recepción de chamadas lévase a cabo dende as 9:00 ata as 11:00 e dende as 12:00 ata as 14:00 horas, tendo en conta que no mesmo momento da reserva telefónica será necesario indicar datos como curso, número de alumnos/as e horario desexado. Esta medida facilitará a organización da visita e redundará nunha maior capacidade de recepción de grupos, polo que cremos que poderá minimizar as listas de espera.
A xestión da visita débese facer a través do seguinte teléfono: 981 563 777 (laborais).
Sen outro particular, convidámosvos a participar nas actividades educativas deste ano desexando que cumpran as vosas expectativas.
| | | | 23/06/2010 | Comeza o horario de verán
| Lembrámoslles que dende o día 23 de xuño a apertura ao público das nosas instalacións os fins de semana e festivos ríxese polo horario de verán, que é de 12:30 a 14:30 e de 16:30 a 19:30.
A xestión da visita débese facer a través dos seguintes teléfonos: 981 563 777 (laborais) e 981 441 020 (non laborais).
| | | | 22/06/2010 | O Presidente da Xunta de Galicia inaugura a Vivenda Bioclimática de Sotavento
| O presidente da Xunta de Galicia, Alberto Núñez Feijóo, acudiu a Sotavento para presidir o acto de inauguración da Vivenda Bioclimática Demostrativa. Feijóo, que estivo acompañado polo Conselleiro de Economía e Industria, Javier Guerra Fernández, apuntou que “esta construción debe ser o antecedente de outras moitas construcións intelixentes en Galicia e España, para aproveitar e aforrar intelixentemente a enerxía”.
O acto, que tivo lugar coincidindo co noveno aniversario do Parque, contou coa presenza de preto dun centenar de asistentes e a intervención de Eliseo Diéguez García, Director do Instituto Enerxético de Galicia (INEGA) e Presidente de Sotavento, dando a benvida aos invitados.
A xornada comezou co descubrimento dunha placa conmemorativa por parte do Presidente da Xunta á entrada da Vivenda Bioclimática, en presenza dos asistentes, que máis tarde puideron visitar este novidoso e innovador proxecto de aforro e eficiencia enerxética na edificación.
Para máis información sobre a Vivenda Bioclimática Demostrativa, visitar a sección "Proxectos" nesta páxina web.
| | | | 14/06/2010 | 15 de Xuño: Global Wind Day en Sotavento
| Este é o terceiro ano consecutivo no que a Fundación Sotavento Galicia participa no Día Mundial do Vento, coordinado por EWEA (European Wind Energy Association) e GWEC (Global Wind Energy Council). Máis de trinta países de todo o mundo tomarán parte nesta celebración, con miles de eventos públicos destinados a promover o uso do vento como recurso enerxético.
Aínda que o Día Mundial do Vento é o martes 15 de xuño, os actos previstos en Sotavento prolongaranse durante toda a semana con diversas actividades relacionadas co vento. Deste xeito, realizaranse actividades específicas que incluirán un curso de voo de papaventos, con material cedido pola multinacional española Eolo Sport, e unha “ruta do vento” para coñecer máis de cerca sistemas que funcionan grazas a este recurso renovable.
Neste período, a enerxía eólica centrará a nosa actividade divulgativa, achegando a todas as persoas interesadas os importantes proxectos que se están levando a cabo nesta instalación para o mellor aproveitamento do vento como recurso enerxético. Entre os máis destacados atópanse: Proxecto Aerogidas, un sistema de mantemento predictivo intelixente baseado en redes neuronais que permitirá adiantarse ás posibles avarías dos aeroxeradores; Efivento, software informático que permite optimizar a xestión dos parques eólicos; Proxecto H2, un sistema que permite acumular electricidade eólica utilizando H2 a fin de poder adecuarse correctamente aos momentos de demanda, etc.
Unha ampla variedade de exposicións, como a de fotografías, debuxos e proxectos gañadores no VIII Certame de Premios Renovables, a de “Muíños do Mundo” e “Papaventos con Historia”, pecharán as actividades semanais.
Para poder visitarnos durante estas xornadas, será necesario concertar a asistencia no teléfono 981 441020.
| | | | 13/05/2010 | Sotavento únese á celebración da Semana Solar Europea
| Por terceiro ano consecutivo participamos nos “European Solar Days”, que se celebran do 17 ao 23 de maio con máis de 7.000 eventos en 16 países europeos.
O obxectivo principal deste evento é dar a coñecer a enerxía solar mediante a súa difusión nos medios de comunicación, estimulando deste xeito a conciencia pública sobre a importancia do uso da mesma. Para isto celebraranse multitude de eventos en diferentes países, como xornadas de portas abertas, festas solares, conferencias, visitas guiadas, exposicións, etc.
Nós tamén nos unimos un ano máis a este evento, dirixindo as nosas actividades a un amplo rango de idades e colectivos, e destacando como principal novidade a posibilidade de visitar as case rematadas obras da vivenda bioclimática demostrativa construída nas nosas instalacións. Deste xeito, e durante toda a Semana Solar Europea 2010, a programación das visitas ás instalacións do Parque irá encamiñada a coñecer un pouco mellor esa forma alternativa de obter enerxía a partir dun recurso tan limpo e inesgotable como é o Sol.
Como último día do evento, o domingo 23 celebraremos unha xornada de portas abertas, onde calquera que o desexe poderá achegarse ás instalacións e coñecer novas formas de aproveitamento solar, activas e pasivas (muro Trombe, solar térmica, solar fotovoltaica, etc.). Se o tempo o permite, tamén convidaremos ás visitas a participar na degustación - demostración das posibilidades dunha cociña solar parabólica cedida pola Fundación Terra, onde elaboraremos chocolate solar feito con leite ecolóxico President.
Lembrámoslles que para poder participar nestas xornadas é necesario xestionar a visita con antelación chamando ao teléfono de xestión de visitas do Parque.
Máis información en:
www.solarday.eu
www.diasolar.es
Programación:
| Descargar  | | | | 23/04/2010 | Sotavento celebra o Día Mundial da Terra
| Con distintos actos nas nosas instalacións, a Fundación Sotavento Galicia participou o 22 de abril nas distintas actividades que, ao redor do mundo, se realizan con motivo deste día. Deste xeito, medio centenar de rapaces de terceiro da Eso do IES Alfredo Brañas de Carballo participaron neste evento.
A reconstrución dunha mámoa, distintos xogos educativos e a visita ás case finalizadas obras da vivenda bioclimática, constituíron as actividades máis destacadas deste Día Mundial da Terra, que xa vai pola súa edición número 40. O 22 de abril de 1970, 20 millóns de persoas celebraron por vez primeira este día. Dende entón, ano tras ano, celébrase este evento en distintos países do mundo. Un dos nosos obxectivos é que tomemos conciencia da repercusión das actividades humanas no medio, fomentando a reflexión e as accións individuais e colectivas, encamiñadas a un uso responsable e eficiente dos recursos enerxéticos de cara a posibilitar un desenvolvemento sostible do Planeta Terra.
| | | | 22/03/2010 | Economía e Industria desenvolveu en Sotavento actividades de promoción da eficiencia enerxética
| O Instituto Enerxético de Galicia (Inega), dependente da Consellería de Economía e Industria, desenvolveu o pasado 18 de marzo en Sotavento diversas actividades de eficiencia, nas que participaron un total de 78 persoas. Os visitantes, procedentes de grupos de As Pontes e Ribadeo, puideron participar en diversos obradoiros, así como nunha visita á vivenda bioclimática demostrativa que se está a impulsar no Parque. Ademais, aos responsables dos grupos convidóuselles a realizar cursos de condución eficiente. O programa de actividades desenvolveuse de 10.00 a 17.00 horas.
Este conxunto de actividades que se realizaron nas instalacións do Parque enmárcanse dentro do programa de actuacións de promoción do aforro e da eficiencia enerxética que a Consellería de Economía e Industria, a través do Inega, levou a cabo, durante o pasado mes de marzo e que tiveron como punto de arranque o 5 de Marzo, “Día Mundial da Eficiencia Enerxética”.
| | | | 28/01/2010 | Máis de 22.000 persoas visitaron Sotavento durante o ano 2009
| Con máis de 22.000 visitantes acumulados no ano 2009 e superando as 1.800 persoas de media ao mes, seguimos a converternos nun referente no eido da divulgación das enerxías renovables na nosa comunidade.
A maior parte das visitas concertadas durante o período 2009 foron realizadas por universitarios e grupos técnicos de diferentes sectores interesados nos innovadores proxectos de investigación que se están a realizar no noso Parque. Familias, particulares, turistas e público en xeral completan o resto das visitas, que se achegaron dende diferentes puntos da xeografía española e mesmo internacional.
Xa son máis de 140.000 visitantes acumulados dende que comezamos as actividades no ano 2002, e o 38 % dos centros de educación formal de Galicia visitaron as nosas instalacións en algunha ocasión, convertendo Sotavento en parte do programa lectivo de moitos colexios, institutos e universidades ao longo do curso.
| | | | 20/01/2010 | O conselleiro de Economía e Industria visita Sotavento
| Javier Guerra, conselleiro de Economía e Industria da Xunta de Galicia, visitou durante case dúas horas a vivenda bioclimática demostrativa e salientou que “se trata dunha experiencia de marcado carácter innovador que nace co obxectivo principal de mostrar o importante papel enerxético e medioambiental que as vivendas poden ter de cara a conseguir un modelo de desenvolvemento sostible”.
Este Centro de Investigación e Divulgación da Arquitectura Bioclimática Sostible pretende amosar á xente con exemplos reais as posibilidades de aforro enerxético que se consegue con este tipo de construcións, á vez que mellora a calidade de vida de todos.
O conselleiro tamén sostivo que “esta vivenda está chamada a ser un referente e unha ferramenta de indubidable importancia para o sector da construción en Galicia e España”. “Deste xeito un completo sistema de captura e procesamento de datos e parámetros tanto enerxéticos, estruturais como climáticos permitirá ter en tempo real unha base de datos única para comprobar, validar e investigar todos os aspectos da vivenda, permitindo a elaboración de estudos e investigacións referentes ás posibilidades que nos ofrecen todos os aspectos relacionados con esta singular vivenda”, subliñou.
| | | | 12/11/2009 | Novo récord de produción eólica en Epaña
| A madrugada do 8 de novembro, a enerxía eólica acadou un novo récord en España cubrindo o 53% da demanda eléctrica nacional. Esta cifra superou con creces o récord acadado o pasado 5 de novembro, onde a enerxía do vento cubriu un 45,1% da demanda.
Segundo datos do Instituto Enerxético de Galicia (Inega), os muíños galegos aportaron este día un 11,1% do consumo español, supoñendo case unha cuarta parte de toda a enerxía eólica aportada á rede.
| | | | 12/11/2009 | O Clube Camper de Galicia visita Sotavento
| Máis de corenta persoas procedentes de toda España achegáronse ata o noso Parque nas súas furgonetas camper.
Unha concentración, organizada polo Clube Camper de Galicia na área recreativa de San Xoan (Guitiriz), aglutinou un grande número destes vehículos chegados dende toda Galicia, Asturias, País Vasco, Navarra, etc. Os participantes interesáronse especialmente polas instalacións de enerxía solar térmica, fotovoltaica e minieólica, dada a posibilidade de empregalos como sistemas enerxéticos nos seus vehículos. A sala de control, consellos de aforro enerxético e a descrición de proxectos como o de acumulación de enerxía en forma de hidróxeno e a xa case rematada vivenda bioclimática completaron as tres horas que permaneceron nas nosas instalacións.
Xa son máis de 18.500 as persoas que visitaron Sotavento no que vai do ano 2009 e máis de 135.000 as acumuladas dende que esta instalación se puxo en marcha no ano 2002.
| | | | 22/09/2009 | Semana Europea da Mobilidade en Sotavento
| Entre o 16 e o 22 de setembro celébrase a Semana Europea da Mobilidade. Esta iniciativa da Unión Europea quere concienciar aos cidadáns das consecuencias negativas que ten o uso irracional do coche, tanto para a saúde pública como para o medio ambiente.
Algúns datos sobre a mobilidade na UE indican que o vehículo privado é o responsable do 75% dos desprazamentos, dos cales o 50% son de menos de 5 km e o 30% non chega ós 3 km. Ademais, por cada km recorrido estamos emitindo á atmosfera uns 178 g de CO2 cun coche de gasolina e uns 162 g cun diesel, emisións que podemos reducir significativamente facendo un uso máis racional deste vehículo.
Para chamar a atención sobre estes e outros aspectos, a Fundación Sotavento Galicia fomentará o uso de bicicletas neste período, ademais de facer especial fincapé nos contidos que esta instalación posúe en relación ao uso racional do transporte. Así, no día de onte, 25 alumnos de 6º de primaria do CEIP Santa María de As Pontes, realizaron a visita exterior ás nosas instalacións empregando bicicletas, un vehículo exento de emisións contaminantes. Deste xeito, os rapaces puideron comprobar, mediante unha aplicación informática especialmente deseñada en Sotavento, as emisións de gases contaminantes que evitaron á atmosfera á vez que realizaban unha actividade física e lúdica.
A Fundación Sotavento invita ás persoas a deixar o vehículo na casa o día 22 coincidindo co Día Europeo “A cidade sen o meu coche” e recordan ademais, que por cada 100 km evitados co coche aforraríamos uns 8,23 € cun de gasolina e uns 5,88 € cun de gasóleo.
| | | | 11/06/2009 | Sotavento alberga un modelo dun dos primeiros aeroxeradores instalados en España
| Hai 25 anos que o aproveitamento do vento para producir electricidade comezou a tomar forma no noso país. Así, o 10 de marzo de 1984, púxose en marcha nunha pequena localidade rural de Girona, un dos primeiros muíños de vento con finalidade comercial instalado en España.
O aeroxerador catalán era un modelo da marca Ecotècnia, xa desaparecido, que tiña 12 m de rotor e 15 kW de potencia, de aí a súa denominación como Ecotècnia 12/15. A súa capacidade de produción era moi reducida en comparación cos modelos actuais, unhas cen veces menos que a media das máquinas que se instalan actualmente.
A instalación do Ecotècnia de 1984 foi unha iniciativa dun grupo catalán ecoloxista de 8 estudantes universitarios de enxeñaría, cuxo soño era producir enerxía limpa a partir dun recurso natural e renovable como é o vento, xurdindo deste xeito a cooperativa Ecotècnia.
O Ecotècnia 12/15 custou daquela uns 14 millóns das antigas pesetas, e podía funcionar tanto en réxime autónomo como conectado á rede. Este modelo pódese ver actualmente exposto dentro das instalacións do Parque Eólico Experimental Sotavento e destaca polo seu sistema de orientación mecánica.
No caso de Galicia, a empresa Engasa (Enerxía de Galicia S.A) instalaba en 1983 en Santa Comba (A Coruña) un Wind Matic 14S, outra das máquinas pioneiras do aproveitamento eólico e que supuxo o primeiro aeroxerador de Galicia. A máquina danesa tivo un custo de 8.204.000 das antigas pesetas e tiña unha potencia de 55 kW.
Estas e outras informacións curiosas sobre muíños e aeroxeradores aparecen na nova publicación editada por Sotavento e que leva por título “Muíños do Mundo”. Dita publicación será presentada oficialmente o día 15 de xuño con motivo do Global Wind Day.
| | | | 22/04/2009 | Educadores ambientais das Illas Baleares coñecen o proxecto educativo-divulgativo da Fundación Sotavento Galicia
| Un grupo procedente das Illas Baleares composto por membros da administración e responsables de equipamentos de educación ambiental, realizaron unha visita ao Parque Eólico Experimental Sotavento. O obxectivo dos asistentes era coñecer as experiencias que no eido da educación enerxética existen en Galicia para promover equipamentos e introducir esta temática na comunidade balear. Coordinado polo CEIDA (Centro de Extensión Universitaria e Divulgación Ambiental de Galicia), o grupo coñeceu o traballo que Sotavento desenvolve na divulgación das enerxías renovables e na concienciación da importancia do uso responsable dos recursos naturais, co obxectivo de acadar un desenvolvemento sustentable. Este equipamento, con máis de 20.000 visitas anuais e máis de 120.000 acumuladas, comeza a ser un referente da educación enerxética dentro e fóra de Galicia.
Durante o percorrido tamén coñeceron o funcionamento do parque eólico e os proxectos de investigación máis recentes que está realizando a Fundación Sotavento Galicia: produción de Hidróxeno con eólica, proxecto comparativo de seguidores solares, a futura vivenda bioclimática, etc.
| | | | 07/04/2009 | Estudantes de Bacharelato do colexio Woodhouse Grove School, situado no norte de Inglaterra, visitaron as instalacións de Sotavento esta semana.
| Durante a visita, os rapaces/as entraron en contacto directo coas enerxías renovables da man de instalacións reais en funcionamento, e descubriron a importancia que ten o aforro e eficiencia no uso dos recursos naturais de cara a acadar un desenvolvemento sustentable. Tamén coñeceron os proxectos que está desenvolvendo a Fundación Sotavento Galicia no eido das enerxías renovables, algún deles pioneiro a nivel europeo.
| | | | 03/04/2009 | Integrantes do Forum Euro-Latinoamericano di Torino coñecen os proxectos de Sotavento
| A visita formaba parte do programa da 2ª Conferencia de este Forum, organizada baixo o lema “Sistemas regionales de innovación: de la visión a la realidad”, e que se desenvolve do 1 ao 3 de Abril en Santiago de Compostela co apoio da Dirección Xeral de Investigación, Desenvolvemento e Innovación (I+D+i) da Consellería de Innovación e Industria da Xunta de Galicia. Os máis de 30 participantes coñeceron as instalacións do Parque Eólico Experimental Sotavento, así como os últimos proxectos de investigación e innovación tecnolóxica no campo das enerxías renovables.
A xornada que se desenvolveu en Sotavento sumouse ás visitas realizadas a outras catro entidades galegas con diferentes experiencias no campo da investigación e desenvolvemento tecnolóxico. Os asistentes a esta visita procedían de diferentes países latinoamericanos e europeos: Chile, Arxentina, Brasil, Colombia, México, Dinamarca, Italia, Francia, Bélxica, etc.
O Forum Euro-Latinoamericano de desenvolvemento rexional basado na innovación é un espazo para potenciar os vínculos de cooperación entre rexións innovadoras de Europa e América Latina. Despois da 1ª Conferencia, celebrada en Turín (Italia) no ano 2007, as actividades que se desenvolven durante estes días van dirixidas a todos aqueles que participan nos procesos de innovación nas súas rexións e que están interesados en ampliar os seus horizontes de colaboración internacional: axencias de desenvolvemento e de promoción da innovación, asociacións empresariais, clusters, centros tecnolóxicos, universidades, sector financieiro, etc.
| | | | 09/02/2009 | A Universidade Nacional de Educación a Distancia (UNED) sénior, da por iniciado o segundo cuadrimestre nun acto celebrado nas instalacions de Sotavento.
| A UNED creou un Programa formativo específico pensado para persoas adultas que contan cun espírito inquedo, con ganas de seguir absorbendo novos conceptos e ideas de entre un extenso abano de posibilidades formativas.
A UNED pretende responder ao desenvolvemento integral desta poboación, co fin de satisfacer o su desexo de aprender. Dende esta perspectiva preséntase a UNED-SÉNIOR, unha iniciativa de formación que se desenvolverá nos Centros Asociados da UNED en España e o estranxeiro.
O bloque “Problemas científicos actuais: medio natural e cambio climático” ocupará as horas lectivas do segundo cuadrimestre, que comezará a súa andadura en Sotavento. A dirección do curso e o profesor encargado de impartir este bloque, D. Rogelio Fernández Díaz, Subdirector Xeral de Espazos Naturais e Biodiversidade da Xunta de Galicia, escolleron este lugar pola súa idoneidade en canto á calidade e cantidade de contidos que ofrece en relación con esta asignatura.
Ao acto de apertura asistiron a Directora da UNED-A Coruña xunto co coordinador do curso, alcaldes de varias localidades da zona: Monfero, Xermade, Guitiriz, Irixoa e Aranga, acompañados de representantes da dirección do Parque.
Ao remate, os alumnos/as matriculados/as participarán nunha sesión formativa dirixida pola Fundación Sotavento Galicia.
Máis información:
www.xestoso.es/senior.pdf
http:// www.uned .es/senior/
| | | | 28/01/2009 | Sotavento participará no Curso de “Didáctica de la Ciencia” organizado por CFIE Ponferrada e a Fundación Ciudad de la Energía
| O curso celebrarase en Ponferrada o día 2 de febreiro e a Fundación Sotavento Galicia participará ca sesión que leva por título “La enseñanza de las energías renovables y sostenibles” que terá unha duración de tres horas.
| | Descargar | | | | 27/01/2009 | Sotavento participa no XXXVIII Curso de Saúde Ambiental
| Este curso enmarcase dentro do “Programa Galego de Municipios Saudables e Sostibles 2000-2009” e está dirixido a técnicos de Concellos, empresas, profesorado, estudantes, etc. Ten como finalidade actualizar a formación dos mesmos e establecer un foro de debate e estudo da situación ambiental dos Municipios galegos
| | | | 20/11/2008 | O director xeral de I+D+i acude ás actividades celebradas en Sotavento con motivo da Semana da Ciencia 2008
| Salustiano Mato, director xeral de I+D+i acudiu durante a mañá do xoves día 20 de novembro ás diversas actividades que desenvolve a Fundación Sotavento Galicia dentro da Semana da Ciencia. Englobadas baixo a denominación de “Ciencia e Enerxía: novas experiencias”, estas actividades teñen como finalidade potenciar a divulgación de experiencias, instalacións e últimos avances científicos que aporta Sotavento, entre os que para este ano cabe destacar:
• Proxecto de interpretación do sistema de Produción de Hidróxeno con Eólica;
• Liña dedicada á divulgación da enerxía solar térmica e fotovoltaica;
• Liña dirixida a tomar conciencia do uso eficiente da auga e do transporte.
Durante a xornada, Salustiano Mato e José Núñez, xerente da Fundación Sotavento Galicia, ademais de presenciar o traballo que nesta liña se estaba realizando con máis de 60 alumnos/as de 3º ESO do IES Isidro Parga Pondal de Carballo, presentaron de forma oficial as actividades da Semana da Ciencia en Sotavento, que rematan o domingo 23 de novembro. Salustiano presentou o programa Diverciencia liderado pola súa dirección xeral ao tempo que salientou a necesidade de presentar a ciencia dun xeito divertido e cercano a toda a poboación, tal e como comprobou nas instalacións do Parque.
José Núñez destacou a aposta da Fundación Sotavento Galicia na achega das novas tecnoloxías á sociedade así como a contínua participación da institución na Semana da Ciencia. -“é oitavo ano consecutivo que Sotavento participa neste evento”-salientou.
A Semana da Ciencia ten carácter europeo e toman parte nela múltiples entidades como universidades, administracións públicas, museos, asociacións, etc.. Celébrase anualmente para achegar a ciencia e á sociedade. En Galicia, a Semana da Ciencia está coordinada pola Dirección Xeral de Investigación, Desenvolvemento e Innovación da Consellaría de Innovación e Industria, en colaboración con FECYT, a Fundación Española para la Ciencia y la Tecnología, entidade dependente do Ministerio de Ciencia e Innovación que coordina o evento a nivel estatal.
Máis información:
www.conselleriaiei.org/ga/dxidi/index.php
www.semanadaciencia.org/actividades/actividade.php?id=305&lg=gal
| | | | 17/10/2008 | A Fundación Sotavento Galicia participa no programa DIVERCIENCIA 2008 co proxecto de divulgación “Ciencia e Enerxía: Novas Experiencias”.
| DIVERCIENCIA é un programa da Dirección Xeral de I+D+i enmarcado no Plan Galego de Investigación, Desenvolvemento e Innovación Tecnolóxica (INCITE), e que ten o propósito de fomentar unha cultura do coñecemento da ciencia e da tecnoloxía que posibilite que o conxunto da sociedade teña unha mellor percepción das actividades de I+D+i e dos resultados que delas se derivan.
O proxecto “Ciencia e Enerxía: Novas Experiencias” presentado por Sotavento ao programa Diverciencia 2008, súmase ás actividades educativas habituais que desenvolve Sotavento durante todo o ano, e ten como finalidade principal potenciar a divulgación dos últimos avances científicos e das investigacións que está levando a cabo esta institución.
Este é o terceiro ano que Sotavento participa no programa, obtendo unha resposta moi positiva por parte dos milleiros de visitantes que se achegan ás instalacións do Parque.
As actividades e actuacións incluídas en “Ciencia e Enerxía: Novas Experiencias” rematan no mes de Novembro e algunhas delas formarán parte da Semana da Ciencia 2008.
Máis información:
www.conselleriaiei.org/ga/dxidi/index.php
| | | | 05/06/2008 | Sotavento presenta unha nova guía sobre aforro e eficiencia enerxética
| Con motivo da celebración do Día Mundial do Medio Ambiente, a Fundación Sotavento Galicia presenta unha nova guía destinada a fomentar o aforro e a eficiencia no uso dos recursos. O obxectivo desta publicación é que o lector tome conciencia da importancia de trocar os seus hábitos co fin de conseguir un modelo de desenvolvemento sustentable que permita a conservación do planeta.
Baixo o título “Abre a porta do aforro e a eficiencia enerxética”, o documento divídese en tres áreas principais que inciden en aspectos ambientais básicos. O uso e consumo responsable da auga, da electricidade e do transporte preséntase de forma esquemática e con consellos realistas, prácticos e cotiáns.
Esta guía, que se entregará gratuitamente ás persoas que visiten o Parque Eólico Experimental Sotavento, reforza e amplia os contidos e equipamentos que a Fundación Sotavento Galicia destina a fomentar o aforro e eficiencia enerxética entre os máis de 20.000 visitantes anuais que recibe.
| | | | 28/02/2008 | Sotavento recibe ao visitante número 100.000.
| O visitante número 100.000, dende a posta en marcha do Plan Educativo-Divulgativo no ano 2002, foi o alumno de 3º da ESO do CPI Monte Caxado de As Pontes, Antonio Gómez Rodríguez. Para celebralo, responsables da Fundación entregáronlle diverso material didáctico.
| | | | 18/02/2008 | Sotavento e a empresa Vertical Partner asinan un convenio de colaboración para a formación e adestramento de persoal técnico especializado.
| As actividades formativas, que se levan a cabo nas instalacións do Parque Eólico Experimental Sotavento, céntranse en traballos en altura mediante a suspensión con cordas e están destinados á reparación, inspección e limpeza de pas e torres.
A limpeza das pas é un mantemento que se debe realizar periodicamente para optimizar o rendemento dos aeroxeradores. A novidade destas actuacións céntrase no emprego de equipos descensores que permiten a baixada dende o alto das torres en lugar de utilizar grúas.
Dada a situación de Galicia en canto ao seu potencial eólico, as actuacións encamiñadas a facilitar e optimizar os mantementos dos aeroxeradores dos máis de 120 parques eólicos galegos, cobran unha enorme importancia. Lembremos que Galicia é unha potencia a nivel mundial en canto a potencia eólica, tendo instalados preto dos 3.000 MW de potencia e contando con arredor aos 4.000 aeroxeradores.
Ademais das actividades educativas e investigadoras, Sotavento tamén é protagonista deste tipo de actividades formativas orientadas á especialización técnica e á optimización do aproveitamento do recurso eólico.
| | | | 28/01/2008 | Representantes de 19 empresas galegas que traballan no exterior visitan Sotavento.
| Con motivo do “Encontro de Empresarios e Profesionais Galegos na Rede” organizado polo IGAPE e celebrado en Santiago do 21 ao 25 de xaneiro, representantes de 19 empresas de orixe galega que traballan no exterior, realizaron unha visita ás instalacións do Parque Eólico Experimental Sotavento.
Despois de ser recibidos pola dirección do parque, foron testemuñas dos novos proxectos que está a desenvolver a Fundación Sotavento Galicia nas súas instalacións, degustaron o xa tradicional café solar de Sotavento e realizaron un percorrido polas distintas salas que ofrece o edificio acompañados polo persoal do Parque.
O percorrido rematou coa visita ao proxecto de acumulación de hidróxeno, moi valorado polos asistentes chegados de Uruguay, México, Xapón, Brasil, Arxentina, Venezuela, etc
| | | | 06/12/2007 | A Fundación Sotavento Galicia e LACTALIS (President), asinan un convenio para potenciar o coñecemento e posibilidades da enerxía solar
| A tal efecto, o xerente da Fundación, José Núnez e o director de Lactalis, asinaron un convenio polo que se realizarán degustacións gratuítas en Sotavento empregando leite ecolóxica preparada con tecnoloxía solar.
Esta actividade porase en marcha inmediatamente e extenderase ao longo do vindeiro ano 2008.
Según a Fundación Terra, as cociñas solares, “ofrecen unha alternativa real aos 1.000 millones de m3 de leña que se empregan no mundo para cociñar, provocando alteraciones climáticas debido á deforestación e a desertización de amplas zonas do terceiro mundo”.
| | | | 28/06/2007 | Participantes no II Congreso Internacional: Enerxía e Desenvolvemento Sostible visitan Sotavento
| Poñentes e congresistas permaneceron en Sotavento tres horas e, entre as distintas actividades, desfrutaron dun café elaborado cunha cociña solar, visitaron o interior dun aeroxerador, tomaron contacto con modelos reais de caldeiras de biomasa, placas solares térmicas, bombas de calor xeotérmicas, solar termodinámica, placas solares fotovoltaicas fixas e con seguidores, etc.
O proxecto de acumulación eléctrica mediante hidróxeno e as exposicións de papaventos e rochas foron especialmente valoradas polos asistentes xunto cos consellos de aforro e eficiencia enerxética.
O Congreso desenvolvese nas Pontes durante os días 27, 28 e 29 de xuño e está organizado polo ICE (Instituto de Ciencias da Educación) pertencente á USC.
| | | | 11/06/2007 | A asociación Pícaros visita Sotavento.
| A visita forma parte do proxecto Parroquias Vivas, que esta asociación está a desenvolver nos últimos meses e que pretende que nenos/as e maiores de Begonte coñezan máis en profundidade as distintas parroquias que conforman o concello, así como os lugares máis significativos do seu contorno, entre os que se atopa o Parque Eólico Experimental Sotavento.
O proxecto conta coa colaboración da Consellería de Cultura e da asociación Terras do Parla así como de diferentes entidades e empresas privadas.
Durante a visita, os participantes entraron en contacto directo coas enerxías renovables e descubriron a importancia e repercusión que ten o aforro enerxético na vida cotiá. Ademais, ao longo da xornada realizáronse diferentes xogos e obradoiros nos que participaron conxuntamente nenos e adultos.
| | | | 25/05/2007 | Presentóuse nas Pontes o disco “Música do vento” gravado con sons dos aeroxeradores de Sotavento
| Nunha experiencia musical única celebrada nas instalacións de Sotavento hai un ano, presentáronse en primicia as pezas musicais compostas por Ignacio Sanz empregando os sons dos aeroxeradores do parque.
Recentemente, o músico foi premiado pola Xunta de Galicia co terceiro premio de excelencia musical que implica a edición das pezas nun disco que leva por título “Música do vento” e que se presentou na Casa Dopeso das Pontes.
| | | | 26/03/2007 | A Fundación Sotavento Galicia participa no Encontro Galego de Equipamentos para a Educación Ambiental.
| O Encontro, organizado pola Sociedade Galega de Educación Ambiental (SGEA) é unha cita dos diferentes profesionais que están a xestionar ou a traballar nalgún dos equipamentos galegos de educación ambiental ou doutros centros que estean a divulgar e poñer en valor o noso patrimonio natural e cultural.
O obxectivo do encontro é informar sobre o marco legal existente na nosa Comunidade, diagnosticar a situación dos equipamentos de educación ambiental, elaborar estratexias conxuntas para a consolidación destas experiencias e propoñer medidas ás institucións competentes para regular e apoiar este dinámico movemento educativo.
O desenvolvemento do programa tivo lugar no Centro de Educación Ambiental Equal en Coles, Ourense.
Máis información en www.sgea.org
| | | | 13/12/2006 | A revista económica DIRIGENTES outorgou a Sotavento Galicia o Premio Dirigentes de Galicia na categoría de Innovación.
| O acto de entrega celebrouse o día 12 de decembro ás 20 h. no Parador Dos Reis Católicos de Santiago de Compostela, presidido polo Conselleiro de Medio Ambiente da Xunta de Galicia.
En representación da nosa empresa recolleu o premio o Presidente do Consello de Administración D. Xoán Dodán García.
A relación de empresas premiadas foi:
Banco Pastor , José Mª Arias, Dirixente do ano.
Maderas Iglesias, Calidade.
Copasa, Empresa do ano.
Fraternidad Muprespa, Xestión Empresarial.
Sotavento Galicia, Innovación.
IGAPE, Institucional.
Ferias e Exposicións de Lugo, Servizo ó cliente.
Anfaco, Medio Ambiente.
Autoridade Portuaria A Coruña, Proxecto do Ano.
Hijos de Rivera, Traxectoria Empresarial.
| | | | 15/11/2006 | Sotavento presenta o seu proxecto educativo no Congreso “Enerxía e Educación Ambiental” que se celebra en Murcia.
| O congreso, organizado pola "Caja de Ahorros do Meditarráneo" e o "Centro Educativo del Medio Ambiente" (CEMACAM), pretende ser un foro de encontro e intercambio de experiencias entre profesionais da educación ambiental e outros axentes implicados na sensibilización, xestión e tratamento do recurso enerxía. As áreas temáticas inclúen a Educación Ambiental nos centros educativos, a levada a cabo en centros de educación non formal (equipamentos como Sotavento) e nos medios de comunicación.
| | | | 08/11/2006 | A ONG Enxeñeiros sen Fronteiras visita o Parque Eólico Experimental Sotavento.
| Durante a xornada uns 70 participantes nas “I Jornadas de Energías Renovables. Aplicaciones y desarrollo” organizadas por enxeñeiros sen fronteiras, visitaron as instalacións de Sotavento. Un dos obxectivos destas Xornadas era “Someter a debate social el uso que de la energía se hace, así como sus métodos de obtención y las diferentes políticas energéticas desplegadas en la actualidad”. O grupo, composto maioritariamente por enxeñeiros industriais e estudantes, destacou a cantidade de contidos e proxectos que se desenvolven neste parque singular, así como o interese das explicacións técnicas recibidas.
| | | | 24/07/2006 | A empresa solar PST instala en Sotavento os seus novidosos paneis solares termodinámicos
| Solar PST, empresa afincada na Coruña, instalou en Sotavento os seus paneis solares termodinámicos. Esta novidosa tecnoloxía combina os principios da bomba de calor coa enerxía solar para a produción de auga quente.
O funcionamento, segundo responsables da empresa, créase mediante a circulación dun fluído capaz de extraer a calor do medio ambiente e transmitilo á auga, aproveitando a radiación solar, a temperatura do aire e da choiva, segundo principios do físico francés Carnot.
Nos paneis solares, entra un fluído en forma líquida a –5/-15ºC. Este fluído é un refrixerante. Os paneis captan a radiación solar durante as horas de sol, absorben a temperatura superior do ambiente, durante todo o día e a da choiva, cando esta xorde. Esta variación de temperatura provoca que o fluído se gasifique, sendo enviado a un bloque termodinámico.
Neste punto, o compresor do bloque, mediante presión, eleva a temperatura do fluído a 110/120ºC, que é transmitida ó circuíto da auga mediante un intercambiador de temperatura.
O equipo implantado en Sotavento exemplifica, de forma real, a instalación necesaria para o consumo de auga quente sanitaria dunha familia de cinco persoas e está composto por un só panel duns 8 Kg. de peso conectado a un depósito de 300 litros. Posto en marcha a finais de xuño, pode visitarse e comprobar o seu funcionamiento de luns a domingo, dentro dos horarios de visita do Parque que atopará nesta web. Esta tecnoloxía tamén se pode utilizar para calefactar vivendas e piscinas.
Máis información www.solarpst.com
| | | | 17/07/2006 | Autoridades brasileiras interésanse polas actividades divulgativas do Parque Eólico Experimental Sotavento
| Unha delegación encabezada polo alcalde da localidad brasileira de Osorio visitou as instalacións de Sotavento. Acompañado de profesores da Universidade do Brasil, periodistas, empresarios da zona e representantes de Elecnor a comitiva, formada por 25 persoas, destacou os traballos que realiza esta singular instalación xermantina.
Osorio puxo en marcha o pasado 7 de xullo o primeiro parque eólico do Brasil. Esta localidade sitúase no Estado de Río Grande do Sul a 80 Km da localidade de Porto Alegre. O complexo eólico, inaugurado polo presidente Lula, contará cunha potencia total de 150 MW suficientes para abasteder a 650.000 persoas e terá ademais un obxectivo similar ao de Sotavento: converterse nun centro de divulgación e formación das enerxías renovables. Esta finalidade motivou a súa visita ás instalacións de Sotavento para coñecer de primeira man a súa experiencia neste eido.
| | | | 08/06/2006 | Reflexión enerxética con motivo do Mundial. Consellos eficientes para ver este acontecemento
| Aproveitando un dos acontecementos que marcarán os hábitos de vida de millóns de telespectadores en todo o Mundo, a Fundación Sotavento presenta esta reflexión baseada en estatísticas e estudos de distintos organismos e Universidades. O obxectivo que se persegue é concienciarnos, ou canto menos, invitarnos a reflexionar sobre a necesidade dun uso responsable da enerxía.
Sotavento ten como finalidade principal o fomento das enerxías renovables e o establecemento de valores de eficiencia enerxética, neste último apartado englóbase esta dedución que ofrece datos canto menos curiosos e que incitan á meditación.
A extrapolación que se pode facer dos mesmos a outras situacións cotiás son interesantes para valorar que o noso medio natural é cousa de todos e que as nosas accións, por mínimas e insignificantes que parezan, teñen sempre unha consecuencia global no medio.
Consideramos que cumprindo os consellos que incluímos conseguiremos, con pouco esforzo, ver un Mundial máis eficiente.
En España existen 50.000.000 de televisores (15 millóns principais) (Ministerio de Industria)
O consumo medio dun televisor aceso é de 73 Wh
Un aparato de TV é compartido por unha media de 3,1 persoas (Universidade de Murcia)
O número medio de telespectadores que viron a televisión durante os sábados do mes de Xuño de 2005 entre as 22:00 horas e as 24:00 horas foi de 9.883.176 persoas
Durante o partido da selección do sábado día 3 de xuño 12.621.212 persoas estaban vendo a televisión
O incremento foi de 2.738.036 de telespectadores, e polo tanto, de 883.237 televisións
O incremento en canto a consumo está fixado en 128.952,602 kW
As emisións de CO2 á atmosfera, asociadas a dito consumo, increméntanse en relación a un día normal en 103 toneladas
Lembremos que este partido era amigable, preparatorio para o mundial e cunha duración aproximada de dúas horas.
Consellos de eficiencia enerxética para ver o Mundial:
Trate de ver o Mundial con amigos ou familiares. A televisión compartida é unha boa forma de consumir menos, pense que elevando a media a seis espectadores por aparato, estariamos reducindo as emisións á metade.
Durante o descanso, en caso de aproveitar ese momento para realizar outras actividades, lembre apagar a televisión. O descansos duran 15 minutos e durante ese tempo podemos aforrar entre todos case 24 toneladas de CO2 apagando a TV correctamente.
Lembre apagar correctamente o seu TV cando deixe de utilizalo. Non utilice o mando a distancia xa que continuando o exemplo, se o número de televisores que sintonizarán o partido se apagasen utilizando a fórmula stand-bye, continuariamos emitindo 19 toneladas de CO2 á hora.
Para refrescarse procure usar envases reciclables como o cristal e non esqueza depositalos nos contedores habilitados a tal fin. Teña en conta que por cada botella que se recicla estamos aforrando a enerxía necesaria para ter unha televisión acesa 3 horas. Pola contra, coa enerxía necesaria para fabricar unha lata de refrescos manteriamos o mesmo televisor en funcionamento durante 2 horas.
Para combater a calor non debemos esquecer pechar as persianas da habitación, como mínimo dúas horas antes do partido, aforraremos en aire acondicionado. O seu consumo é duns 900 Wh.
Os Mundiais acostuman aumentar as tiradas dos xornais. Non esquezamos o seu reciclado.
E lembre, o medio é cousa de todos.
| | | | 23/05/2006 | O conservatorio das Pontes organiza un concerto de música en Sotavento
| O pasado 26 de maio ás 20.00 horas, celebrouse en Sotavento unha experiencia musical que leva ba por título é-vento de música falada. Organizado polo Conservatorio de Música Profesional das Pontes, constou dunha charla didáctica para pequenos e maiores onde se tratou dun xeito ameno a maneira en que se usa o vento na música e na fala, seguida dun concerto de trompetas, percusión e poesía.
Este é-vento comeza coa idea de fusionar o feito musical co vento na súa acepción máis actual: o aproveitamento da súa enerxía para o uso ordinario. Non obstante, remata cunha mestura de vento, xeradores eólicos, música e palabras, todo isto envolto nun ambiente de aprendizaxe e respecto pola Natureza. A finalidade é facer unha homenaxe musical ó vento, que tanto lle da á música e á palabra; así como á Natureza, que tanto nos dá a todos.
Os contidos do é-vento teñen como punto neurálxico a peza de Ignacio Sanz 'Música do vento', composta en abril de 2006. Formada por seis movementos, todos eles feitos dende un punto de vista poético e nos que se mesturan diversas gravacións, dende os sons producidos polos propios aeroxeradores do Parque, os de instrumentos feitos con material reciclado como tixolas ou paelleiras, ata os poemas compostos polo grupo 'Alalá'. Da mesma maneira tamén se mesturan os recursos musicais clásicos como a retrogradación contrapuntística e os contemporáneos como a aleatoriedade.
Máis información na área divulgativa desta web, na sección concursos e eventos
| | | | 05/04/2006 | Unha plataforma elevadora dedicada á reparación de pas foi probada, por primeira vez en España, en Sotavento
| A empresa LM dedicada á fabricación e mantemento de pas de aeroxeradores, comprobou durante o martes 4 de abril as posibilidades desta plataforma elevadora e a súa viabilidade para facilitar o acceso a estes compoñentes tan esenciais para o correcto funcionamento dos aeroxeradores. A máquina, utilizada en Alemaña, foi probaba por primeira vez en España. A manobra consistiu na montaxe, elevación de 5 operarios e desmontaxe posterior. Non é la primeira vez que se presentan en Sotavento este tipo de innovacións destinadas a facilitar e sobre todo a mellorar a seguridade dos traballos en altura. Pode verse unha foto das actuacións na sección “galería de fotos” na área divulgativa introducindo no buscador LM.
| | | | 05/04/2006 | Unha delegación do Uruguai visita Sotavento
| Unha delegación procedente de Uruguai visitou as instalacións do Parque Eólico Experimental Sotavento durante a mañá do martes 4 de abril. O grupo, composto por nove persoas relacionadas co sector enerxético deste país, foi acompañado por persoal do IDAE dependente do Ministerio de Industria español. O motivo da súa visita foi a próxima construción en Uruguai dun parque eólico con aeroxeradores de tecnoloxía española dentro dun programa de conversión de débeda externa por infraestruturas públicas acordado polos dous países.
A delegación, asistiu a un relatorio sobre a operación e mantemento dos parques eólicos e interesouse polo programa de xestión desenvolvido por Sotavento. A visita tivo unha duración de tres horas e nela os asistentes tiveron ocasión de coñecer de primeira man os avances tecnolóxicos e investigacións levadas a cabo no eido da eólica neste parque.
Os asistentes destacaron a importancia desta visita dende o punto de vista das actuacións que pretenden para o seu país cunha forte dependencia enerxética do petróleo.
| | | | 21/10/2005 | Sotavento presenta o seu novidoso sistema de Xestión Integral de Parques Eólicos
| Nunha conferencia de Enerxía Eólica, celebrada o pasado 19 de outubro e organizada polo Institute for International Research (IIR) en Madrid, presentouse oficialmente o Sistema de Xestión de Parques Eólicos desenvolvido por Sotavento.
O sistema baséase en optimizar a xestión dos parques eólicos e foi ideado para detectar as perdas de rendemento das turbinas.
O programa é independiente do sistema SCADA do fabricante das turbinas. Os datos introducidos (de forma automática ou manual) fíltranse, ordénanse e gárdanse nunha base de datos central para posteriormente ser procesados e poder así elaborar diversos informes, tales como:
•Resumo de fluxos de enerxía en parque
•Resumos dispoñibilidades e comportamento da curva dos aeroxeradores
•Informes completos de torres anemométricas
•Dispoñibilidades de aeros (elaborados de varias formas segundo solicitude)
•Curvas de potencia de aeros segundo Norma 61.400-12
•Desviacións e perdas de enerxía, en período de funcionamento, con erros, período mantemento, ...
•Mapa de datos para determinar o comportamento dos aeros, de forma moi visual
•Exportación de datos nun formato único para calquera aplicación ofimática
Etc, etc
Todos os resultados dos informes poden ser contrastados, ao dispoñer da posibilidade de exportar valores e indicarse método de cálculo.
Así mesmo, a elaboración de informes e envío por diversos medios (ftp, mail) pode ser automatizado. Tamén é posible o envío de mensaxes a móbiles cando existen erros nas turbinas, permitindo reducir os tempos de
parada das máquinas e así optimizar a súa produción.
O programa, en fase de comercialización para empresas con interés na súa utilización, foi valorado positivamente polos asistentes a estas jornadas que se celebran anualmente.
Máis información nesta páxina na sección Proxectos dentro da área técnica.
| | | | 15/09/2005 | Sotavento Galicia incorpórase á patronal eólica de Galicia (EGA)
| Sotavento Galicia, S.A., incorpórase á Asociación Eólica de Galicia (EGA) que integra a case todos os promotores eólicos da Comunidade Galega: Acciona Eólica, Desarrollos Eólicos Nuon, Energías e Recursos Ambientales, Endesa Cogeneración y Renovables, Enerfín, Eurovento, Gamesa, Norvento, Vestas, Eólica Galenova, Fergo Galicia, Isolux Watt, Somersa e Sotavento
| | | | 09/09/2005 | Unha empresa dedicada á emsamblaxe de placas solares visita Sotavento.
| Un grupo de mulleres zamoranas, especializadas na ensamblaxe de placas solares fotovoltaicas, visitaron esta mañá as instalacións de Sotavento co fin de coñecer as distintas tecnoloxías que posee esta singular instalación. Á fronte do grupo Estela Abril explicaba a comprobada fiabilidade e tempero que as mulleres teñen ante os homes para desempeñar este tipo de traballos, concretamente o soldado con estaño de células solares para producir electricidade. Segundo Estela, a empresa Pevafersa, situada en Toro (Zamora), encabeza a formación destas especialistas que en breve pasarán a formar parte do seu persoal laboral, converténdose na única empresa española destinada á fabricación íntegra de placas solares.
| | | | 14/06/2005 | Sotavento supera os 50.000 visitantes.
| Sotavento recibiu o seu visitante número 50.000. Foi Alba Ferreira Domínguez do IES Antón Fraguas de Santiago.
| | | | 12/05/2005 | Nace a “Fundación Sotavento Galicia”.
| Esta Fundación é creada pola sociedade Sotavento Galicia, S.A., e os fins que perseguirá son os seguintes:
► A promoción, divulgación, formación, fomento e debate de todos os aspectos relacionados coas enerxías renovables.
► A promoción e realización de proxectos, estudos e outras actuacións de investigación e experimentación relacionadas coa eólica en particular e coas enerxías renovables en xeral.
► Fomentar e divulgar a importancia do aforro e eficiencia enerxética para conseguir un desenvolvemento sostible.
► Promover, divulgar e fomentar as actuacións que vinculen o desenvolvemento enerxético coa súa iteracción co medio natural.
► Calquera outro tipo de actuación que implique unha mellora na optimización e implantación das enerxías renovables en xeral e da eólica en particular.
O cariz que adquiriron as actuacións no ámbito de I+D mediante o desenvolvemento de diferentes proxectos, interesantes para o sector como son: o programa de xestión de explotación de parques eólicos, a comparación dos rendementos das tecnoloxías, a predición de xeración, etc; así como no ámbito da divulgación das enerxías renovables, coa afluencia de máis de 46.000 persoas que pasaron polo parque eólico, motivaron a necesidade de crear esta fundación.
Desta maneira, Sotavento Galicia, S.A. desenvolvería o que é a actividade comercial consistente na venda de enerxía e a Fundación destinaríase a actuacións de interese xeral, tal e como se sinalaba ó comezo.
| | | | 13/12/2004 | Sotavento supera os 40.000 visitantes
| Desde o inicio do Plan Educativo-Divulgativo en Xaneiro de 2002, xa se superaron os 40.000 visitantes, de todo tipo de idades, procedencias, colectivos e coñecementos previos.
| | | | 10/12/2004 | Sotavento recibe un premio polo seu labor educativo
| A Asociación Europea Eurosolar galardoou co Premio Especial destinado ás iniciativas de educación a Sotavento. O certame, que este ano acada a súa terceira edición, premia as iniciativas ou os desenvolvementos exemplares no campo da utilización das enerxías renovables no Estado Español.
| | |
|
