Remata con éxito o Seminario de Hidróxeno e Xestión enerxética. Tiña por obxectivo o de pór en valor o Proxecto de Acumulación de Enerxía Eólica en forma de Hidróxeno desenvolvido de forma conxunta pola Xunta de Galicia, Gas Natural Fenosa e a Fundación Sotavento Galicia. A xornada debuxou o escenario da orixe do proxecto e as capacidades e usos enerxéticos do hidróxeno.
Ademais, o seminario pretendeu dar a coñecer as problemáticas suxeitas á produción renovable no eido da xestión así como as distintas posibilidades do uso do Hidróxeno como vector enerxético.
Para iso, Gas Natural Fenosa e Sotavento convocaron un gran número de expertos pertencentes a Rede Eléctrica de España, Centro Nacional das Enerxías Renovables, Centro Nacional do Hidróxeno, Xunta de Galicia, Instituto para a Diversificación e Aforro de Enerxía (IDAE) e Fundación do Hidróxeno de Aragón.
O seminario estaba dirixido principalmente a profesionais relacionados co sector enerxético, estudantes universitarios pertencentes á rama científica ou eléctrica e a todas aquelas persoas relacionadas dalgún xeito co eido das enerxías renovables e/ou da química, tan de actualidade neste 2011, ano dedicado mundialmente a esta disciplina.
Case un centenar de asistentes participaron nestas interesantes xornadas chegados de distintos puntos de España.
Descargar programa: seminario_h2
