Minieólica
No Parque Eólico Sotavento está instalado, ata o momento, un único aeroxerador de pequena potencia. Como o resto das instalacións, monitorízase e almacénase a información relativa aos principais parámetros.
A potencia nominal do aeroxerador é de 1,5 kW. A instalación, do mesmo xeito que a solar fotovoltaica, encádrase dentro das destinadas a cubrir as necesidades eléctricas na vivenda bioclimática.
Atópase situado ao nordeste da vivenda sobre unha torre autoportante de 8 m de altura. O aeroxerador é do tipo bipá e de orientación pasiva a barlovento.
Descrición técnica
O modelo do aeroxerador é INCLIN 1.500 de BORNAY, coas pás fabricadas en fibra de vidro e carbono. O xerador é do tipo síncrono, trifásico e de imáns permanentes de neodimio, sendo este o encargado de transformar a enerxía mecánica transmitida polas pás en enerxía eléctrica. A corrente alterna xerada é de frecuencia e tensión variables; por iso, na sala de instalacións rectifícase mediante un inversor a corrente continua, para a continuación volver transformarse en corrente alterna en condicións axeitadas de tensión e frecuencia para a súa inxección á rede.
Monitorízanse e almacénanse variables tanto eléctricas como meteorolóxicas, co fin de avaliar o comportamento deste miniaeroxerador:
Parámetros monitorizados
- Velocidade do vento
- Dirección do vento
- Tensión, intensidade, potencia activa e reactiva no lado de alterna
- Potencia instantánea
- Enerxía xerada acumulada
Características do aeroxerador
| Marca e modelo | BORNAY Inclin 1500 |
|---|---|
| Nº de pás | 2 |
| Diámetro | 2,86 m |
| Material das pás | Fibra de vidro / carbono |
| Tipo de xerador | Trifásico de imáns permanentes |
| Imáns | Neodimio |
| Pot. nominal | 1.500 W |
| Tensión nominal | 120 Vac |
| Vento para arranque | 3,5 m/s |
| Vento para pot. nominal | 12 m/s |
| Vento para freado automático | 14 m/s |
| Peso | 42 kg. |
Características do inversor
| Marca e modelo | BORNAY Aurora 3600 |
|---|---|
| ENTRADA CA | |
| Potencia máxima de CA | 3.600 W |
| Tensión CA | 0-600 V |
| SAÍDA CA | |
| Tensión CA de saída | 230 V – 50 Hz |
| Corrente máx. de saída | 16 A |
| Conexión de CA | Monofásica |
| Rendemento | 96,0 % |
Aplicación demostrativa
Sotavento dispón dunha aplicación demostrativa, visual e interactiva, que permite ver os datos da instalación en tempo real e realizar múltiples cálculos e extrapolacións.
ACCESO E DESCARGA DE DATOS
Os parámetros da instalación minieólica do Parque Eólico Sotavento almacénanse nunha base de datos e intégranse nunha aplicación de descarga de datos. Esta aplicación permite ás organizacións, empresas ou universidades coas que Sotavento mantén convenios de colaboración acceder á información necesaria para o desenvolvemento de proxectos.
Listaxe completa dos parámetros almacenados nas instalacións do parque eólico e vivenda bioclimática