Solar Térmica

A instalación solar térmica está emprazada na cuberta sur da vivenda bioclimática demostrativa situada no Parque Eólico Experimental Sotavento. Está formada por oito captadores solares térmicos de 2,5 m² de superficie de absorbedor cada un, sumando unha superficie total de captación de 20 m².

A instalación está orientada ao sur (180º) e integrada sobre o tellado da vivenda cunha inclinación de 19º. A conexión hidráulica entre os paneis realizouse en paralelo, distribuíndose en dúas baterías de catro. Os captadores achegan a enerxía solar que captan ao sistema de calefacción e ACS a través dun depósito interacumulador de 1.000 litros. Esta enerxía emprégase en producir ACS e como achega á calefacción. O sistema de emisores térmicos da vivenda é chan radiante, unha das características do mesmo é que opera a baixas temperaturas, no rango habitual de 35 ºC-45 ºC. Así, as instalacións con este tipo de emisores permiten que unha porcentaxe da demanda enerxética de calefacción se poida efectuar mediante unha instalación solar, sempre e cando as condicións ambientais exteriores e a demanda interna do edificio o permitan.

Parámetros monitorizados

• Temperatura do fluído na entrada e saída da batería superior
• Temperatura do fluído na entrada e saída da batería inferior
• Temperatura do fluído na entrada e saída ao interacumulador solar
• Temperatura do interacumulador solar en tres niveis
• Humidade relativa
• Irradiancia horizontal
• Datos pluviométricos
• Velocidade e dirección do vento