O Parque Eólico Experimental Sotavento convoca o XI Certame Renovable con premios para as categorías de Fotografía e Pintura e Debuxo.
Un ano máis, este certame pretende incentivar diferentes iniciativas relacionadas co mundo das enerxías renovables en xeral e coa idea de Sotavento en particular. Deste xeito procúrase un maior coñecemento da realidade enerxética que nos rodea caracterizada polo esgotamento de recursos e polos problemas ambientais derivados dun excesivo consumo de enerxía.
As fotografías e debuxos presentados antes do 24 de maio do 2013 ás 12:00 horas, serán valorados por un xurado cualificado que terá en conta a creatividade, orixinalidade, enfoque do tema, calidade e funcionalidade, etc. A fotografía que resulte gañadora obterá un premio de 500 €, mentres que os debuxos gañadores de cada un dos tres ciclos de educación infantil e primaria, recibirán un cheque regalo por valor de 100 €.
